Үстіміздегі жылдың 10 айы бойынша республикалық бюджетті уақытылы игермеген мемлекеттік органдардың тізімі жасақталды, деп хабарлайды Елорда Инфо.
«Республикалық бюджеттің шығыны 9 трлн 565 млрд теңгені құрайды немесе 99,2 пайыз. Оның ішінде 11 млрд теңге үнемделді. Бюджеттің игерілмеуі – 68 млрд теңге. Бұл жерде осы айдың нәтижесін көрсететін бюджеттің пысықталуы ескерілмеген.
Республикалық бюджетті уақытылы игермеген мемлекеттік органдардың қатарында Экология, геология және табиғи ресурстар министрлігі – 10,1 млрд теңге, Білім және ғылым министрлігі – 9,3 млрд теңге, Индустрия және инфрақұрылымдық даму министрлігі – 7,8 млрд теңге, Мәдениет және спорт министрлігі – 6,1 млрд теңге және Цифрлық даму, инновациялар және аэроғарыш өнеркәсібі министрлігі – 5,1 млрд теңге», - деді Үкімет отырысында Премьер-министрдің бірінші орынбасары, Қаржы министрі Әлихан Смайылов.
Үкімет басшысы орынбасарының айтуынша, мемлекеттік органдармен қатар, жергілікті бюджеттің де игерілмеуі орын алып отыр.
«Өкінішке қарай, 10 айдың қорытындысы бойынша бюджет 3 рет пысықталып, 2 рет түзету енгізілгеніне қарамастан, мемлекеттік органдармен қатар, жергілікті жерлерде де бюджеттің игерілмеу жағдайы бар», - дейді ол.
Айта кетсек, бүгін Үкімет отырысында еліміздің 10 айдағы әлеуметтік-экономикалық даму қорытындысы қаралуда.