Алматыда Азияның өнер жұлдыздары концерт өткізеді (ВИДЕО)

Алматы күнін атап өту аясында Азияның әлемге танымал өнер жұлдыздары Медеуге келіп концерт өткізеді. Star of Asia (Азия жұлдыздары) деп аталатын осынау мегажоба тамыздың 19-20 күндеріне жоспарланған.

Бұл күндері алматылықтарды қала күнімен құттықтауға Қазақстанның, Түркияның, Оңтүстік Кореяның, Әзірбайжанның, Жапонияның, Өзбекстан мен Үндістанның ең танымал әншілері келеді. Олардың қатарында корейлердің «U-KISS» K-pop тобы, үнді жұлдызы Sanah Moidutty, түрік әншісі Murat Boz бар. Сондай-ақ, отандық эстраданың ең танымал өкілдері: МузАРТ, Қайрат Нұртас, Айқын, Әли Оқаповтар да бұл күні алматылықтар үшін ән шырқайды.

Билеттер Kassir.kz, Chocolife.me, Ticketon.kz сайттарында, Республика сарайы мен MEGA ойын-сауда орталығында сатылуда.