17.10.2018, 09:12

Алматы облысында ашынған жұрт жолды жауып тастады

Олар жүргіншілер жолағының маңына көлік қозғалысын бақылайтын бейнекамера орнатуды талап етіп отыр. Өйткені қатты жылдамдықпен жүйіткіген жүргізушілер белгіні елемейтін көрінеді. Соның кесірінен қаншама адамды көлік қағып кеткен. Шенеуніктер талаптарымызды орындамаса күнара жолды жауып, көлік жүргізбейміз дейді жұрт.

Талдықорған іргесіндегі Мелькомбинат ауылының тұрғындары шыдамның шегіне жеткенін айтады. Өздері жауып тастаған дәл осы жолдан өту нағыз қияметке айналған. Себебі, бұл ауылдың балалары Есенгелді ауданының орталығы Қарабұлаққа қатынап оқиды. Ол жаққа жету үшін жалғыз жүргіншілер жолағынан иманын үйіріп өтеді. Өйткені белгіні елеп жатқан көлік жүргізушілері жоқ. Қатты жүйіткігені сонша, адам қағып кетуден тайынбайды. Сондықтан осы маңға көлік қозғалысын бақылайтын камера орнатуды талап етіп отыр.

«Неше рет машинаның астына түсе жаздадық. Біздің сұрайтынымыз жол белгісін басқа жерге аударыңыздар. Мына жерге камера қойсын», - дейді Мелькомбинат ауылының тұрғыны Әлия Қаракенеева.

Бұл маңда жол апаты жиі болады. Соңғы рет осыдан төрт күн бұрын 17 жастағы студентті көлік қағып кеткен. Құрбыларымен сабаққа бара жатқан ол сол жерде қаза тапты.

«Ол жүргіншілер жолағымен жолдың арғы бетіне өтпек болды. Қатты жылдамдықпен көлік қағып өтті. Бәрі көз алдымда болды. Даянаны он метр жерге дейін ұшырып жіберді. Мен қасына жүгіріп барғанымда жүріп кеткен екен», - дейді оқиға куәгері Алина Әбдірайымова.

Жолды жапқан тұрғындардың мәселесін жергілікті шенеуніктер жақсы біледі екен. Бірақ қаржының жоқтығын айтып қол қусырып отыр.

«Енді келесі жылға бюджетке өтініш жіберілді. Енді өздеріңіз түсінесіздер ғой, айтқан кезде салына салмайды ғой», - дейді Есенгелді аудандық автокөлік жолдары бөлімінің басшысы Егіздер Серікбаев.

Тұрғындар жол бойына қатты жылдамдықты шектейтін белгі мен бақылау камерасын орнатпаса, күнара осы жерге жиналатындарын айтады. Бір мезгіл қозғалысты тоқтатып, өздері жүргізушілерді тәубесіне келтіріп отырмақшы.

Дереккөз: КТК телеарнасы

Telegram-каналға жазылып, бәрінен хабардар болыңыз!

Тағы да оқыңыздар:
Загрузка...
SN туралы      Жарнама

      info.skifnews@gmail.com

«SN.kz» ақпараттық порталына гиперсілтеме жасалған жағдайда ғана материалдарды қолдануға рұқсат етіледі. Ақпараттан дәйексөз алынғанда міндетті түрде сілтеме жасалуы тиіс. Жазбаша түрде рұқсат берілмеген жағдайда материалдарды коммерциялық мақсаттарға пайдалануға болмайды.

   

Skifnews жаңалықтарын Facebook-те
оқу үшін "Нравится" белгісін басыңыз

  

 

©2016-2018 Skifnews.kz. Авторлық және жарнама құқықтар толығымен сақталады.