$ 439.43 € 473.31 ₽ 4.82
Биыл Оңтүстік Қазақстан облысы өнеркәсіп өнімдерін өндіруде өсу қарқыны бойынша республикада 3-ші орынды иеленген. Сондай-ақ, облыста тоқыма, мұнай өңдеу, машина жасау, фармацевтика, медициналық құрылғылар жасап шығару, құрылыс материалдары және басқа да саларда жаңа өнім түрлерін өндіру қолға алынған.
Бұл туралы облыс әкімі Жансейіт Түймебаев Тәуелсіздіктің 25 жылдығына арналған «Қазақстанда жасалған» тауар өндірушілердің көрмесі барысында айтты. Оның сөзінше, соңғы 25 жылда облыстағы өндіріс көлемі мен одан келген табыс еселеп өскен.
«Жалпы, әлемдік дамудың күрделі кезеңдеріне қарамастан, Елбасымыз Нұрсұлтан Әбішұлы Назарбаевтың көрегендікпен жүргізіп жатқан дана саясаты арқасында, тарихы қысқа мерзімде еліміз әлеуметтік-экономикалық жағынан қарқынды дамып, әлемнің бәсекеге қабілетті елу елдің қатарына енді. Оның ішінде, Оңтүстік Қазақстан облысының жетістіктері де орасан. Мәселен, 25 жыл ішінде жалпы өңірлік өнім 1,5 млрд.теңгеден 2,5 трлн. теңгеге дейін өссе, ондағы өнеркәсіптің үлесі 15 пайыздан 28 пайызға дейін артты. Осы қарқын ағымдағы жылы да сақталып, 10 айда өнеркәсіп кәсіпорындарымен 643,1 млрд. теңгенің өнімі өндірілді»,- деді Жансейіт Қансейітұлы көрмеге келген қонақтарға.
Айта кетейік, екі күнге жалғасатын шарада өңірдегі жеңіл өнеркәсіп, машина жасау, фармацевтика, тамақ өнеркәсібі, құрылыс заттары салаларының 70-тен астам кәсіпорындарының отандық өнімдері қойылды.
