Шетпеде мектеп оқушыларын тасымалдайтын автобустың қарт жүргізушісі кішкентай қыздарды азғырды деп айыпталуда. Зейнеткер оқушылардың біріне: "Сағындым, сағат 15:00-де мектеп алдында күт. Алып кетемін" деп SMS-хат жолдаған. Бұл туралы Лада порталы хабарлап отыр.
Автобус жүргізушісінің кішкентай қыздарды азғырып келгені туралы ақпаратты тілшілерге зәбір көрген оқушының таныстары айтқан. Оның мәліметінше, қыздың телефонындағы SMS-хабарламаны мұғалімі кездейсоқ көріп қалып, дереу дабыл қаққан.
"Қыздың өзінің айтуынша, автобус жүргізушісі оған үнемі SMS-хат жазып және телефон арқылы хабарласып отырған. Сондай-ақ, ол өзге қыздарды да назарынан тыс қалдырмаған. Оларға тәттілер сыйлап, тізесіне отырғызып құшақтаған, иіскеген. Балалар мұғалімге шағымданыпты. Алайда, педагог мұны баланың қиялы шығар деп мән бермеген", - дейді сұхбат берген әйел.
Мән-жайдың қиял емес екенін түсінген ұстаз дереу ата-анаға хабар беріпті, Ата-ана болса полицияға арызданған. Тәртіп сақшыларының айтуынша, 1948 жылғы ер азамат шұғыл іздеу шаралары барысында ұсталған.
"Бүгінгі таңда ҚР Қылмыстық кодексінің 124-бабы 1-тармағы бойынша іс қозғалды. Күдікті қамауға алынды. Іс сотқа жолданып отыр. Ұсталған азамат уақытша қамау абақтысында", - дейді Маңғыстау облыстық ІІД баспасөз қызметі.
Күдікті зейнеткер жұмыс істейтін мектеп ұжымы болса болған жайтқа сене алар емес. Олар бұған дейін ешқандай оқушыдан шағымның түспегенін айтып отыр.
"Бұл жүргізуші біздің мектепте 2012 жылдан бері жұмыс істейді. Осы уақыт аралығында ол өзін тек жақсы жағынан ғана көрсетті. Балаларға әкесіндей қарайтын. Біз оның кінәлі екеніне сенбейміз. Балаларза жазған хатын да көрмедік. Оның үстінен арыз жазылғаннан кейін балалардың бірде-бірі бұл мәліметті растамады", - дейді мектеп мұғалімдері.