«Алланың сынағы»: Мұхамеджан Тазабек күйеуінен көп табыс табатын әйелдерге ақыл айтты (ВИДЕО)

Айтыскер ақын Мұхамеджан Тазабек күйеуінен көп табыс табатын әйелдерге ақыл айтты, деп жазды Skifnews.kz ақпарат порталы.

Қазір қоғамда ақшаны, дүниені күйеуінен көп табатын әйелдер кездесіп жатыр, төңірегімізде бар. Бұл жерде де нәзік мәселелер бар. Ол да бір Алланың сынағы ғой. Сіз ақшаны күйеуіңізден көп тапсаңыз, күйеуіңізге қандай қарым-қатынас жасайсыз? Оны төмен қарай езіп жібереміз бе, әлде ортақ дүние ретінде пайдаланып күйеуіңізбен ортадағы махаббатты күшейтесіз бе? Мысалы, Пайғамбарымыздың бірінші әйелі Хатиджа анамыз күйеуінен көп тапты. Бірақ «мен көп таптым» деген жоқ, қайта күйеуінің тұлға болуына, жұртқа дінін жеткізуіне жәрдемдесті. Өзінің малын, дүниесін күйеуінің қоғамның алдындағы жұмысына жұмсады. Тарихты қарасаң кемел 4 әйел бар. Ертең жәннатта бүкіл әйелдерден биік тұрады. Соның бірі Хатиджа анамыз. Неге десеңіз, сол өзінің тапқан дүниесін күйеуімен бөлісу, оның ұлы миссиясының жолында жұмсау арқылы Алланың алдында дәрежесі көтеріліп кетті. Сол сияқты сіз дүниені көп тапсаңыз, ол – тағдырыңыз. Алла әркімге әр қалай береді, бірде еркекке, бірде әйелге береді. Бірақ сіз оны қалай пайдаланасыз, сынақ сонда, – дейді айтыскер ақын.

Десе де ақынның бұл кеңесі желі қолданушыларының бәріне бірдей ұнай қойған жоқ.

«Екі есе, көп тапсам да, ақша ортақ отбасымызға жұмсалады», «Еркектің тапқаны бәрібір берекелі», «Жұмыс істеп, көп ақша табатын әйелді білемін. Ал күйеуі үйде жатып әйеліне дөрекі сөйлейді, ақша талап етеді», «Көп тауып, ортада жаратып көрдік, жатып алды», «Табысымыз ортақ», «Еркек жаман үйреніп алады», – деп жарыса жазды олар.