Алматыда №86 бағыты бойынша жаңа автобустар жүре бастады

«Барлық автобустар төмен еденді, мүмкіндігі шектеулі жандар үшін орындар бар. Барлық жылжымалы состав «Евро 5» экологиялық сыныбына жатады. Юиыл біз барлығы 388 автобус сатып алдық, олардың 100-і шағын сыйымдылықты және таулы жерлерге арналған, қалғандарының сыйымдылығы үлкен және орташа. Олар қалаға жетісімен бағыттар бойынша жүретін болады», -деп атап өтті «Алматыэлектротранс» ЖШС-нің директоры Ризван Цинаев.

Тасымалдаушылар №86 бағытының қалада барынша танымал екендігін, Орбита-1 ықшам ауданынан бастап азаматтық авиация Академиясына дейін баратынын, қаланың орталығын, Әл- Фараби даңғылын, Фурманов көшесін, Райымбек және Сүйінбай даңғылдары мен басқаларын қамтитынын айтты.

«Бұрын автобустардың жетіспеушілігінен көлік сирек жүретін, сөйтіп тұрғындардан жиі шағым түсетін. Бізге дейін бұл бағытқа жеке тасымалдаушы қызмет көрсеткен еді. Енді аталған бағыт толық жабдықталып, автобустар кесте бойынша жүретін болады», - деді Р.Цинаев.

Айта кетерлігі, «Алматы-2020» қалалық даму бағдарламасының басты қағидаларының бірі қоғамдық көлікті реформалау,соның барысында жылжымалы состав жаңаруда. Еске салсақ, бұған дейін №65, 50, 103, 126, 112 бағыттары жаңарған еді. Бұлармен қоса №77 бағыт та өзінің жұмысын жаңғыртты. Жылжымалы составты жаңарту ісі басқа бағыттарда да жалғасаатын болады. Жыл аяғына дейін Алматы қаласының әкімдігі мегаполистің автобус паркінің 30%-ын жаңартуды жоспарлап отыр.

Еске салайық, Алматы қалалық Жолаушылар көлігі және автомобиль жолдары басқармасының басшысы Мақсұт Исахов жыл соңына дейін мегаполиске 500-дей жаңа автобустың жеткізілетінін мәлімдеген болатын. Сондай-ақ, ол еліміздегі алғашқылардың бірі болып жолаушылар тасымалымен айналысатын жеке компанияларды субсидиялап жатқанын да мәлімдеді.

«Әлем елдерінің көбінде жолаушылар тасымалы мемлекет тарапынан субсидияланады. Біз бұл процесті енді бастадық. Қазір 12 бағыт бойынша жүретін автобустарды субсидиялап жатырмыз. Мәслихаттың келесі сессиясында тағы 32 бағыт бойынша жүретін автобустарға субсидия бөлуді сұраймыз. Сөйтіп, жыл соңына дейін 44 бағытты субсидиялаймыз. Бұл бағыттарды тек жаңа автобусы бар компанияларға ғана береміз», - деді басқарма басшысы жергілікті БАҚ өкілдеріне берген сұхбатында.