Алматы облысында ауыл әкімі көшенің қарын өзі тазалап жүр

Алматы облысының Алакөл ауданындағы Көлбай ауылының әкімі қарды трактормен өзі тазалап жүр. Жергілікті тұрғындар ауыл басшысының еңбекқорлығына тәнті болып, оны видеоға түсірген деп жазады ҚазАқпарат.

Журналистің «бұл әрекетіңізге намыстанбайсыз ба?» деген сауалына ол өзін осы ауылдың ешбір тұрғынынан артық емес екенін айтты.

«Жоқ, керісінше. Мен осы Көлбай ауылында туғанмын. Кіндік қаным тамған туған ауылымның халқына қызмет етуден ешқашан шаршамаймын. Қар тазалайтын мекемелер біздің ауылдың ішкі жолдарын толықтай білмейді. Ал мен тракторға отырып алып, жалғыз адам жүретін жолдарды да тазалаймын. Ол жұмысым үшін ешуақытта намыстанған емеспін. Керісінше, халқыма пайдамның тигеніне ризамын. Осыдан екі күн бұрын ғана қарды тазалап едім, тағы да жауды. Қазір тазалап жатырмын», дейді Көлбай ауылының әкімі Ержан Шәкеров.

37 жастағы Ержан Шәкеров бес баланың әкесі. Ол өнерден де кенде емес. Өлең жазып, ән шырқап, домбыраның құлағында ойнайды. Ал оның Көлбай ауылының әкімі болғанына 1 жыл 2 ай болыпты.

Айта кету керек, Ержан Шәкеров ауылға айрықша сіңірген еңбегі үшін Президенттің «Құрмет» грамотасымен марапатталған болатын. Ол мұндай құрметке 2017 жылы Тәуелсіздік мерекесі қарсаңында бөленді. Алматы облысының әкімі Ержан Шәкеровке марапатты салтанатты шара барысында табыстады.