«124 бас сиыр өлді»: Хромтауда асыл тұқымды мал уланып қырылып жатыр (ВИДЕО)

Ақтөбе облысы Хромтау ауданының Қопа ауылында асыл тұқымды 124 сиыр қырылып қалды деп жазады Азаттық. Қырылған мал жергілікті жеке шаруа қожалығына тиесілі болыпты. Облыстық ветеринария басқармасының басшысы Кеңес Қанатбаев абердин-ангус тұқымынан тарайтын сиырлар ескі мия шөбінен уланып қалғанын айтады.

- Жергілікті сиырлар бұл шөпті жемейді. Шетелден әкелінген мал осы шөптен уланған. Ірі-қараның жаппай ауыру дерегі 18 тамыздан бастап тіркелді. 18-19 тамыз аралығында қырылған барлық малдың өлексесі толық өртенді, - деді Кеңес Қанатбаев.

Облыстық ветеринария басқармасы шаруашылықтағы эпизоотиялық жағдайды бақылап отырғандарын мәлімдеді. Ресми мәліметке сәйкес Қазақстанда 7 миллионға жуық ірі қара мал бар. Жергілікті БАҚ-тың хабарлауынша, ауыл шаруашылығы министрлігі алдағы 10 жыл ішінде шетелден 1 миллион асыл тұқымды ірі қара мал импорттамақ.

ВИДЕО: Бахытжан Курмановтың Facebook-парақшасынан алынды