Талдықорған қаласындағы шағын аудандардың бірінен әскери қызметшінің мәйіті табылды. Бұл фактіні ҚР Қорғаныс министрілігі Ақпарат және коммуникация департаментінің басшысы Данияр Әлжанов растады, деп хабарлайды Skifnews.kz ақпарат порталы, ҚазАқпарат-қа сілтеме жасап.
«Талдықорған қаласының Қаратал шағын ауданында 36 жастағы әскери қызметшінің өлі денесі табылды. Жергілікті полиция жедел-тергеу тобын құрып, істің жай-жапсарын анықтауды бастап кетті, - дейді Данияр Әлжанов.
Оның айтуынша, Қорғаныс министрлігі заңнамаға сәйкес марқұмның отбасына көмек көрсетеді.
«Аталған факті сотқа дейінгі тергеп-тексерулердің бірыңғай тізілімінде Қазақстан Республикасының Қылмыстық кодексінің 99-бабы «Адам өлтіру» бабы бойынша тіркелген. Тәжірибелі полиция қызметкерлерінен құрылған жедел-тергеу тобы бұл қылмысты ашу үшін шаралар қабылдауда», - деді Алматы облысының полициясы.
Қазіргі кезде әскери қызметшінің өліміне қатысты тергеу ісі Ішкі істер министрлігінің бақылауында.