Жамбыл облысында жоғалған әйел шөлді аймақтан табылды

37 жастағы жоғалып кеткен әйел жайлы хабарды Жамбыл облысы Сарысу ауданының полицейлеріне Саудакент ауылының тұрғыны жеткізген, деп хабарлайды polisia.kz.

Ағасының айтуынша, әйел үйден белгісіз бағытта шығып кетіп, жақындарымен байланысқа шықпаған. Ол 2011 жылдан бастап психикалық диспансер орталығында есепте тұрады.

Хабарламадан соң Сарысу аудандық полиция бөлімінің барлық жеке құрамы шұғыл жоғалған әйелді іздеуге жұмылдырылған.

«Іздеу жұмыстарына волонтерлер мен жергілікті тұрғындар, аудандық төтенше жағдай бөлімінің қызметкерлері де қосылды. Іздестіру шаралары Сарысу ауданының елді мекендерінде ғана емес, шекара маңындағы ауылдардың аумағында да жүргізілді. Көшелер, үйлер, аулалар, қараусыз қалған ғимараттар мен жертөлелер, жолдың бойлары да тексерілді. Жоғалған әйел 5 күннен кейін жазық далада ауыр жағдайда табылды», – деп жазылған хабарламада.

Есін білгенмен, суық пен аштықтан әбден қажып, әлі құрыған. Сол жерде оған медициналық көмек көрсетілді.

– Құқық қорғау органдарының қызметкерлеріне, волонтерлерге және тұрғындарға іздеу шараларына белсенді түрде қатысқаны үшін алғыс айтқым келеді. Сарысу АПБ бастығы Асхат Алметов бастаған полиция қызметкерлері күн-түн демей іздеу жұмыстарын жүргізді. Енді таба алмағанымызда бауырым қайтыс болар еді. Тіпті елестетудің өзі қорқынышты, – деді әйелдің ағасы.