Оны өнердегі достары мен отбасы түнгі 00:00-ден кейін құттықтады.
7 қараша қазақтың маңдайына біткен жарық жұлдызы туған Мейрамбек Бесбаевтың дүние есігін ашқан күні, деп хабарлайды Skifnews.kz ақпарат порталы.
Мейрамбек Беспаев – қазақ эстрадасының жарық жұлдызы, "Музарт" тобының солисі, Қазақстанның еңбек сіңірген қайраткері. 1976 жылдың 7 қарашасында Жамбыл облысы Талас ауданында туған. Тараз қаласындағы №37 қазақ орта мектебінде оқыған. Содан соң осы қаладағы Глинка атындағы музыкалық мектептің қобыз сыныбын тәмамдаған. 1989 жлы Алматыдағы К. Байсейітова атындағы музыкалық мектепке ауысады. 1994-1998 жылдар аралығында Т. Жүргенов атындағы өнер академиясының драма, кино, актер факультетін бітірген.
Мейрамбек – отбасында үш ағайынды. Үйінің тұңғышы, өзінен кейін Айнұр, Гүлнұр есімді екі қарындасы бар.
Әкесі – Әбіләшім Беспаев, анасы – Жібек Жолдасова. Әнші ата-әжесінің қолында тәрбиеленген. "Әжем керемет ән айтатын, әншілік маған сол кісіден дарыған шығар", — дейді жұлдыздың өзі.
Бала кезінде футболға қызығып өскен Мейрамбек есейгенде дәрігер болуды армандапты. Алайда өнерге деген құштарлығы басым түскен. Сонымен қатар, кішкентай кезінде қолына қағаз-қарындашын алып, жиі сурет салған.
Бүгінде қоңыр дауысты үнімен әр қазақтың жүрегіне жол тапқан Мейрамбек Беспаевты дүйім жұртқа танымал еткен "Бозторғай" әні еді. Жетім баланың зар-мұңын жүрекке жеткізе білген қаршадай баланы жұртшылық "қазақтың Бозторғайы" атап кетті. Тіпті осы әнді орындағаннан кейін ел арасында "Мейрамбек жетім екен, оны біреулер асырап алған көрінеді" деген сынды қаңқу әңгімелер тараған.
Мейрамбек Беспаевты алғаш рет киелі сахнаға шығарып, әншінің жұлдызын жаққан – бас ұстазы Алтынбек Қоразбаев.