Арман Дәулетияров жалғыз қызын ерекше құттықтады (ВИДЕО)

Ресейдің ұлттық музыкалық арнасы Muz-TV-дің бұрынғы бас директоры, медиаменеджер Арман Дәулетияров қызы Айяның туған күніне орай әсерлі жазба жариялады, деп хабарлайды Sn.kz ақпарат порталы.

Ол әлеуметтік желідегі парақшасында қызының 10 жасқа толғанын айтып, әкелік сезімі жайлы жүрекжарды сөздер жазды. Дәулетияровтың айтуынша, қыз балаға деген махаббат ұлдарға деген сезімнен кем емес, бірақ мүлде бөлек, ерекше әсер береді.

«Айя… қазір 10 жаста. Алғашқы маңызды белес. Мен күн өткен сайын қызға деген махаббаттың ұлдарға деген сезімнен бөлек болатынын жиі аңғарамын. Ол артық та емес, кем де емес. Тек өзгеше.

Бізде төрт ұл және бір қыз бар. Барлығы — біздің өміріміз, мақтанышымыз бен бақытымыз. Бірақ сен — жалғыз қызсың. Көптен күткен қызымсың. Сен дүниеге келгеннен бері менің бойымда бұрын болмаған ерекше әкелік сезім пайда болды.

Сенің арқаңда мен көп нәрсеге басқаша қарай бастадым. Басқаша уайымдаймын. Басқаша қуанамын. Басқаша толқимын.

Мен әрқашан жаныңдамын, менің гүлім. Жақсы көремін. Әкең», - деп жазды ол. 

Желі қолданушылары да Айяны туған күнімен құттықтап, әке мен қыздың арасындағы жылы қарым-қатынасқа тәнті болғандарын жазуда.