«Төркіні келгенде төрде отыру керек»: Құдалықта шәй құйып жүрген Алтынай Жорабаеваның қызы сынға қалды (ВИДЕО)

Қазақстандық әнші Алтынай Жорабаеваның қызы Айнараның келін болып, құдалықта шай құйып жүрген видеосы әлеуметтік желіде қызу талқыға түсті. Желі қолданушылары жас келіннің төркіні келгенде шай құймауы керек екенін айтып, өз пікірлерін білдірді, деп хабарлайды Sn.kz ақпарат порталы.

Видеода Айнараның келін болып, қонақтарға шай ұсынып жүргенін көруге болады. Қыздың нағашы ата-әжесі де немересінің келін атанғанын көріп, толқыған сәтін жасыра алмады. Олар көздеріне жас алып, Айнараға ақ тілектерін арнаған.

Алайда видео әлеуметтік желіде жарияланғаннан кейін, қолданушылардың назары басқа мәселеге ауды. Кейбір желі қолданушылары қазақтың салт-дәстүріне сәйкес, келіннің төркіні келген кезде оның қызмет көрсетіп, шай құюы дұрыс емес екенін жазды.

«Төркіні келгенде төрде отыру керек», «Төркініне шай құймайды», «Шайды басқа абысындары құюы керек» деген пікірлер айтылды.

Желі қолданушыларының пікірінше, қыздың төркіні келгенде жас келінге құрмет көрсетіліп, оны қонақ ретінде төрге отырғызған жөн. Ал келген қонақтарға шай құюды үйдегі өзге келіндер атқаруы керек деген түсінік бар.

Дегенмен, қазақы дәстүрдің орындалу тәртібі әр өңірде және әр әулетте әртүрлі болуы мүмкін. Сондықтан видеодағы жағдайға қатысты пікірлер де екіге бөлінді. Бір тарап Айнараның келін ретінде өз міндетін атқарып жүргенін қалыпты жағдай деп бағаласа, енді бірі төркіні келгенде оған қызмет жасатудың жөнсіз екенін айтты.

Айта кетейік, Айнара – Алтынай Жорабаеваның екінші қызы. Оның келін болып, жаңа шаңыраққа түскен сәттері әлеуметтік желіде бұған дейін де көпшіліктің назарын аударған.

Ал бұл жолғы видеода Айнараның нағашы ата-әжесінің немересін келін ретінде көруі ерекше эмоциялық сәтке айналған. Жақындарының қуанышы мен көз жасы желі қолданушыларының да назарын аударды.

Осылайша, бір видеодағы қарапайым ғана шай құю рәсімі қазақтың салт-дәстүріне қатысты қызу пікірталасқа себеп болды.