Анкарадағы Түркі әлемі жұлдыздарының концертіне Димаш Құдайберген арнайы шақырылды

Анкарада 500-ге жуық әртістің қатысуымен 10 мыңға жуық көрермен жиналған ауқымды концерт өтті. Кешке Димаш Құдайберген арнайы қонақ ретінде шақырылды, деп хабарлайды sn.kz ақпарат порталы.

Түркия астанасында алғаш рет түркі әлемінің танымал өнерпаздарының басын қосқан ауқымды концерт өтті. Іс-шара Түркия Республикасының күніне және Түркі мемлекеттері ұйымының (ТМҰ) алдағы саммитіне орай ұйымдастырылды. Сахнаға әр елдің өкілдері шығып, бауырлас халықтардың музыкалық және мәдени мұрасын паш етті.

Концертке 500-ге жуық өнерпаз қатысып, 10 мыңға жуық көрермен жиналды. Бағдарламаға ұлттық музыка туындылары, опералық шығармалар мен дәстүрлі билер енді. Өнерпаздардың өнерін Түркия Президентінің симфониялық оркестрі сүйемелдеді.

Кештің басты қонағы – Қазақстанның халық әртісі Димаш Құдайберген болды. Оның өнерін тамашалау үшін әлемнің түкпір-түкпірінен жанкүйерлері арнайы келген. Көрермендер әншіге қосыла ән шырқап, ерекше қошемет білдірді.

Түркия Президенттік симфониялық оркестрінің бас музыкалық жетекшісі әрі дирижері Джеми Джан Делиорман Түркия мен түркі әлемі үшін маңызды оқиғалар қарсаңында концерт ұйымдастырудың өзі зор мәртебе болғанын атап өтті. Оның айтуынша, музыка – халықтарды жақындастыратын күш, ал түркі елдері өнерпаздарының шығармалары оркестр репертуарынан орын алған. Сондай-ақ ол Димаш Құдайбергеннің концертке қатысуының айрықша маңызын атап, әншіні Қазақстанның ғана емес, тұтас түркі әлемінің мақтанышы деп бағалады.

Димаш Құдайберген мәдениет пен өнерді дипломатияның маңызды құралы деп санайды. Оның пікірінше, бірлескен шығармашылық жобалар елдер арасындағы достықты нығайтып, халықтардың өзара түсіністігін арттыруға ықпал етеді. Әнші түрік өнерпаздарымен бір сахнада өнер көрсетіп, қазақ музыкасын шетелдік тыңдарманға танытуға әрдайым мән беретінін жеткізді.

Концертке Димаштың әлемнің әр түкпірінен келген жанкүйерлері қатысты. Ресейлік тыңдармандарының бірі әншіге және оның шығармашылығына арналған өлеңдер жинағын көпшілікке таныстырды. Ол Димаштың өнер жолын жеті жылдан бері бақылап келе жатқанын және осы уақыт ішінде оған арнап көптеген өлең жазғанын айтты. Жинақ биыл жазда жарық көріп, бүгінде Мәскеудегі 17 кітапхананың қорына енген.

Қазақстан атынан опера әншілері Салтанат Дәулетханова мен Зарина Алтынбаева өнер көрсетті. Зарина Алтынбаева түркиялық солист Мурат Караханмен бірге бірнеше шығарма орындады. Әнші концертке қатысуды үлкен мәртебе санайтынын айтып, мұндай шаралар бауырлас елдер арасындағы байланысты нығайтуға ықпал ететінін атап өтті.

Концерт түркі халықтарының ортақ музыкалық мұрасын танытып, өнер арқылы мәдени байланысты нығайтты.