Белгілі продюсер Гүлзира Айдарбекова келіні Жұлдыз Әбдікәрімованың жаңа қызметін сатып алмағандарын айтты. Ол он жыл бойы үйде отырған Жұлдыздың бала тәрбиесі мен келіндік міндетімен қатар, жоғары оқу орнын бітіріп алғанын атап өтті.
«Осы жарнама шыққалы, Жұлдыз журналистерге орын қалдырмады, оқымаған деп, біреулер бұрқыратып жазып бастады. Жұлдызға 10 жыл бойына, мал бақтырып, сиыр саудырып қойғаным жоқ. Тұрмысқа шыққанша колледжді бітірсе, тұрмысқа шыққаннан соң, балаларын дүниеге әкелді, ибалы келін, сүйікті жар болумен қатар, жоғарғы оқу орнын да тәмамдап алды.
Қайрат шыңға шыққанша нені бастан өткізбедік, кір іздеу, мұқату, аяқтан шалу, жала жабу. Сіздердің білетіндеріңіз тек «Праймдағы» жағдай ғана, бірін білсеңіздер, бірін білмейсіздер. Сынаққа сынып кетпей шыңдала түскен тәрбиемізді көріп өскен «Көп өмір сүргеннен емес, көпті көргеннен сұра» дегендей, Жұлдызым қайсарлығымен бәрін жеңіп шығатынына сенімдімін», – деп жазды Гүлзира Айдарбекова Instagram-парақшасына.
Ал, Жұлдызға қатысты айтылған сындарды продюсер көреалмаушылыққа теңеді. Сондай-ақ, қыз-келіншектерді өз келінінен үлгі алуға шақырған.
«Пара беріп, жетістікке жетпей-ақ қояйын. Осы уақытқа дейін 1 тиын пара бермей, таза, қара тер еңбегімізбен қасықтап жиған абыройымызды шелектеп шаша алмайды екенбіз. Жұлдызымның өте үлкен сынға түскелі тұрғанын, алда небір аяқтан шалу болатынын біліп те сезіп те отырмын. 10 жыл бойына сабырлықпен отырды екен деп, 100 жыл отыр демейтін шығармыз.
Әр нәрсенің шегі бар. Оның да алға қойған мақсаты бар, өзіне деген сенімі тағы бар. Қазақтың бір келіні Жұлдыздай-ақ болып алсын. Қайта қыздарыңыз бен келіндеріңіз, жас аналар Жұлдыздың төзімділігінен, еңбекқорлығынан үлгі алсын. Қолдарыңыздан келсе сәттілік тілеңіздер. Жұлдызым, жұлдызың жана берсін! Біздің және ұл-қыздарыңның бағына, өмірің ұзақ, ғұмырлы болсын жаным! «Суға салса батпай, отқа салса жанбай» өзіңнің пәк төзімділігіңнің арқасында шыңға шығып, үмітімізді ақтайды деп үлкен сенім артамын. Сәттілік серігің болсын», – деп Қайраттың анасы келініне деген ақ тілегін жеткізді.