«Жеңіл оймен жүре алмайсың»: Тәуекел Мүсілім келіншегінің «астына көпшік қоя» мақтауын асырды

Отыздан асқанда бойдақтық кезеңнен қоштасқан актер Тәуекел Мүсілім жарын қалайша ұнатып қалғаны және арадағы таныстықтарының махаббатқа ұласқаны жайлы айтып берді. Бұл туралы Skifnews.kz ақпарат порталы, Shownews.kz-ке сілтеме жасап хабарлайды.

Келіншегінің "астына көпшік қоя", мақтауын асырған өнер иесі отбасылық өмірінің артықшылықтарын да айтып салды. 

«Бір көргеннен ұнаттым. Әрі қарай таныса келе, сөйлесе келе үлкен сезімге ұласты. Жарымның адамгершілігі, тәрбиесі, кең жүректілігі баурап алды. Адамдарды жақсы көріп, әрдайым көмектесуге дайын тұрады. Екеуміздің өмірге деген көзқарасымыз да бір. Үйленгелі бәрі басқаша, бұрынғыдай жеңіл оймен жүре алмайсың. Ертерек үйге барайын, анамды көрейін, әйелімді құшақтайын деген сияқты», - деп ойын жеткізген актер әйелінің немен айналысатынын да жасырмады.

Кейде, түсірілімдерден кеш келетініне жарының түсіністік танытатынын айтқан актер қазір тойларына қызу дайындықты бастап кеткен.

«Қазір жетінші курста оқып жатыр. Биыл бітіреді. Әрі қарай арнайы маман болу үшін тереңірек оқысам ба деген ойы бар. Ол жағын осы жеті жылдығын бітіргеннен кейін көре жатамыз. Ал тырнақпен тек хобби ретінде айналысып жүр. Болашақта дәрігер болып жұмыс істейді. 

Тойға дайындық басталды. Қазір адам санын түгендеп қойдық. Енді мейрамхананы іздейміз. Махаббаттың көйлегін де қарастырып жатырмыз. Ал безендіру тағы қалған ұсақ-түйегін тойхана тапқан соң ойластырамыз. Қуанышыммен ортақтасуға өзіме ең жақын адамдарды, туыстарымды, ағайын-бауырларымды, өнердегі жүрген барлық әріптестерімді шақырамын. Мен үшін бастысы сол», – деген Тәуекел Мүсілім әйелінің  көпшілік назарында жүруіне қарсы емес.