«Халық жауы» қылсаңдар да осы пікірде қаламын!» - Балғынбек Имашев

«Тағдырымды вакцинаға емес, Аллаға тапсырдым» деп жұртты вакцина алмауға шақырып жүрген айтыскер ақын Балғынбек Имашев коронавирус инфекциясына қарсы екпе мәселесіне қатысты тағы бір пост жазды,  деп хабарлайды Skifnews.kz ақпарат порталы.

Бұл жолы айтыскер ақын індетке қарсы екпеге түбегейлі қарсы екенін тағы да қайталап айтып, вакцинацияның мәжбүрлі түрде салынып жатқанына шүйліккен.

«Вакцина салдыру ерікті түрде деген бос сөз болғаны ма? Біздің биліктің сөзіне сенуге болмайтын сияқты. «Мектеп директорларын «қамшылау» керек» деген не масқара? Қайдасыңдар, батыр қазақтың ерлері мен қыздары? Елдің көз-жасына қалудан қорқатын басшы қалмаған ба? Мекеме басшылары! Әр түрлі деңгейдегі әкім-қара, шенеунік, директор, ректор, т.б қызметтегі азаматтар! Алланың алдында қол астыларыңдағы әр адамның хақынан сұраласыңдар!  

Вакцина алдым деп жаһанға жар салған желідегі жарнамашылар! Не үшін? Ешкім қыстамаса, өтінбесе, сұрамаса, талап етпесе, белгісіз екпені не үшін, кім үшін насихаттап жатырсыңдар? Рамазан айы ғой. Өтірік ақталмаңдар! Алла жүректеріңдегі сырды біледі. Көбің кресло үшін, басшыға жағу үшін салдырдыңдар! Денсаулық үшін емес! Бәріңнің жүректеріңде күмән бар! Көбің тәуекелге бардыңдар. Өзіңнің артың шыдамады, мақұл. Енді басқаларды зорламасаңдаршы! Маған дайректке жазып жатқандар жетеді. «Амал жоқ, жоғарының бұйрығымен, қоқан-лоққысымен салдыруға мәжбүрміз» дейді. Өз еркімен салдырғандарға қарсы айтарым жоқ. Бірақ, олардың саны аз ғой. Көбі амалсыз салдыруда. Мен екпеге қарсымын! Бүгін «халық жауы» қылсаңдар да осы пікірде қаламын. Қайда менің Ата Заңыммен кепілдік берілген құқығым?», - деп жазған өзінің Instagram парақшасында.