Танымал өнер жұлдызы өзінің әлеуметтік желілері арқылы көрермендеріне мәлімдеме жасады, деп хабарлайды Экспресс К.
Әнші Төреғали Төреәлі өзінің Instagram-дағы парақшасы арқылы жаңа әні мен клипін таныстырды. Оның айтуынша, "ұрпағым жылынсын деп өздерін отын еткен, келешегім кеңістікте жүрсін деп өздерінің ғұмырын абақтыда өткізген ата-бабаларымыз аз емес".
"Тәуелсіздік күнін күліп тойлап отырсақ, фәниден жылап өткен жақсы-жайсаңдардың арқасында деп білемін. Ұлы далада тұлпардай кең көсілген жылқы мінезді қазақ тұсау мен кісен көрмей мәңгілікке еркін болғай!" — дейді әнші.
Бұл Төреғали орындаған жаңа әннің бейнебаяны екен. Оның сөзін белгілі айтыскер Ринат Зайытов, әуенін Ерген Айтымбетов жазған. Ал бейнебаян әнші Мейрамбек Бесбаевтың идеясы бойынша түсірілген.