Еліміздің жаңа картасын жасауға қанша теңге жұмсалды

Үш жаңа облыстың құрылуына байланысты Қазақстанның жаңа картасы әзірленді. Бұл туралы цифрлық даму, инновациялар және аэроғарыш өнеркәсібі вице-министрі Әсет Тұрысов мәлімдеді, деп хабарлайды Sputnik Қазақстан.

Орталық коммуникациялар қызметінде құрамында жаңа құрылған облыстары бар Қазақстанның әкімшілік-саяси картасы таныстырылды.

"Былтыр президенттің жарлығымен үш жаңа облыс – Абай, Жетісу, Ұлытау облыстары құрылды. Осыған сәйкес үкімет іс-шаралар жоспарын бекіткен болатын. Ондағы тармақтардың бірі – Қазақстан Республикасының саяси картасын және жаңа облыстардың тақырыптық картасын өзектендіру болды", - дейді Тұрысов.

Айтуынша, министрлік қызметкерлері үлкен жұмыс атқарып, 1:1 500 000 масштабымен Қазақстанның әкімшілік-саяси картасын жасап шығарды.

Сондай-ақ Қарағанды, Шығыс Қазақстан, Алматы облыстарының картасы жаңартылды және 1 млн масштабпен Абай, Ұлытау, Жетісу облыстарының карталары әзірленді. Бұған қоса, 1:25 000 масштабпен Қарағанды, Семей, Өскемен, ал 1:10 000 масштабпен Қонаев, Жезқазған, Талдықорған қалаларының жоспар-сызбасы жаңартылды және жасалды.
Осы орайда журналистер Қазақстанның жаңа картасын жасауға қанша ақша кеткенін сұрады.

"Қазақстанның саяси-әкімшілік картасы мен алты облыстың картасын жасауға, облыс орталықтарының жоспар-сызбасын әзірлеуге 56 млн теңге жұмсалды. Соның ішінде Қазақстан картасының өзіне 10 млн теңге кетті. Жалпы республикалық бюджеттен 56 млн теңге жұмсалды", - деп жауап берді цифрлық даму, инновациялар және аэроғарыш өнеркәсібі министрлігі геодезия және картография комитетінің төрағасы Қажымұқан Бекмұқашев.