Шымкентте жасыл желек жаппай қурап жатыр

Шымкентте қылқан жапырақты ағаштар қысқы аязға шыдамай үсіп кеткен. Салдарынан бір ғана этносаябақта жеті жүз түп ағаш кесіледі. Әйтпесе жанындағы сау қарағайлар да ауру жұқтырып, қурап кетуі мүмкін, деп хабарлады "Хабар 24".

Ал табиғат жанашырлары шаһарға көрік береді деп егілген ағаштарға дұрыс күтім жасалмағанын алға тартады. Этносаябақ тұрғындардың көңілін көншітпей, қала көркін қашырып тұр. Мұнда қарағай тұқымдастарының үш түрі егілген. Солардың бірі жаз басталмай жатып көктей солды.

Өзбекстанда будандастырылған қарағайдың "Эльдар" деген сорты бұл. Ыстыққа төзімді болғандықтан сол жақтан арнайы әкелінген. Алайда күн көзін жақсы көретін өскін қысқы аязға шыдамай, үсіп кетті.
Табиғат жанашыры Роза Байсариева өскіндерді суару жүйесі мен оның күтіміне де көңілі толмайтынын айтады. Одан бөлек бұл ағаштар арзан бағаға сатып алынған. Сол себеті көшеттердің көктейтін күні де көпке созылмады, дейді.

"Қырым қарағайын будандастыру арқылы алынған қарағайдың түрі мынау. Ол бізге сәйкес келмейді. Арзан заттың құны да болмайды. Жайлы ортаны қалыптастыру басқармасының кемшілігі. Тендер ұтқандар қандай ағаш әкелді, соның қыр-сырын анықтап, содан соң егу керек еді", - дейді биолог Роза Байсариева.

Шаһарда қылқанжапырақты ағаштың жетпіс мыңнан астам түрі бар. Оның он мыңға жуығы қайта көктемеді. Салаға жауаптылар бар кінәні табиғаттың қатал мінезіне жауып отыр. Қураған ағаштардың бойына нәр жүгірту үшін өңдеу жұмыстары қолға алынған. Ал желек жаймаған 700-дей ағаш маусым айында түбінен кесіледі.

"Мердігер мекемемен 5 жылға келісімшарт жасалған. Өзінің инвестициясы бар. Соның есебінен сол жердегі 700 үсік жалған қылқан жапырақты алқапты қалпына келтіреді", - ептүсіндірді Жайлы ортаны дамыту басқармасы басшысының орынбасары Әбілхайыр Оңғар.

Биыл күз айларында шаһарға тағы 200 мың жас көшет егіледі. Бірақ бұл жолы суыққа төзімді түрін егеміз, дейді мамандар.