Павлодарда жасөспірім суға батып кетті

Павлодарда суға батып кеткен колледж студентінің денесі табылды, деп хабарлайды Pavlodarnews.kz.

Облыстық ТЖД баспасөз қызметінің мәліметінше, сағат 15.33-те қашықтан басқару пультіне Усолка көпірінің маңында адам суға батып бара жатқаны туралы хабарлама түскен. Оқиға орнына жедел-құтқару жасағының 5 қызметкері екі құтқару қайығымен шыққан. Сондай-ақ, төрт медициналық қызметкер, 7 полиция қызметкері және ТЖД үш қызметкері жұмылдырылған.

«Өкінішке қарай, жасөспірім құтқарушылар жеткенге дейін суға батып кетті. Іздеу жұмыстары жүргізілді. Сағат 16.06-да сүңгуірлер 2006 жылы туған студенттің денесін жағадан 20-25 метр қашықтықта, 2-3 метр тереңдіктен тапты», - деді департаменттен.

Ол үш адаммен бірге демалып, белгіленбеген жерде шомылған. Марқұм суға бата бастағанда досы оған қарай жүзіп, алып шығуға тырысқан. Жастардың айтуынша, олар алкогольді ішімдіктер ішпеген.