Таразда 14 жыл бойы халықаралық іздеуде болған азамат ұсталды

Жамбыл облысы Полиция департаментінің Ұйымдасқан қылмысқа қарсы күрес басқармасының қызметкерлерімен 2009 жылдан бері ҚР ҚК 178-бабы 2-бөлігі, 257-бабы 3-бөлігі (ескі редакция) бойынша іздеуде жүрген 49 жастағы Ө. есімді азамат ұсталды, деп хабарлайды Skifnews.kz ақпарат порталы.

Осыдан 14 жыл бұрын Тараз қаласында тонау және бұзақылық деректерін жасағаны үшін оған қатысты іздеу жарияланған болатын.

Жедел мәліметтерге сәйкес ол бірнеше жылдар бойы шет мемлекеттердің аумағында бой тасалаған.

Биыл 7 қарашада жамбылдық полицейлермен арнайы операция жүргізу барысында іздеудегі азамат Алматы қаласындағы фитнес залдарының бірінде ұсталды. Күдіктінің бет-бейнесі өзінің туған ағасына ұқсағандықтан, полиция қызметкерлеріне ол өзін бауырының есімімен таныстырған. Анықтау жұмыстарын жүргізу үшін бір мезгілде оның туған ағасы Жамбыл облысының Полиция департаментіне жеткізілді. Аталғандардың саусақ іздері алынып, жеке бастары толық анықталған соң іздеудегі азамат Алматы қаласы Полиция департаментінің уақытша ұстау изоляторына қамаққа алынды, – делінген Жамбыл облысы Полиция департаментінің хабарламасында.