Қазақстандық гандболшылар әлем чемпионатына жетінші мәрте қатысып отыр.
Бүгін гандболдан әйелдер арасындағы әлем чемпионатында Қазақстан құрамасының 25-32 орындар үшін сайыстағы қарсыластары анықталды, деп хабарлайды Skifnews.kz ақпарат порталы.
Kazınform мәліметінше, енді әрбір топта төртінші орынды місе тұтқан құрамалар Президент кубогында екі топқа бөлінеді.
Қазақстандық гандболшылар G тобында сынға түсіп, Испаниядан 17:34, Бразилиядан 16:46, Украинадан 24:37 есебімен жеңіліп қалды.
Енді ел құрамасы екінші топта Чили, Иран, Конго Республикасы құрамаларымен кездеседі.
Бүгін, 6 желтоқсанда Конго Республикасымен ойнаса, 9 желтоқсанда Чили, 11 желтоқсанда Иранмен шеберлік байқасады.
Әлем чемпионаты 17 желтоқсанда мәресіне жетеді.
Қазақстандық гандболшылар әлем чемпионатына жетінші мәрте қатысып отыр. Әзірге ең жоғары көрсеткіші – 2007 жылғы 18-орын.
Айта кетсек, әлем чемпионаты 1957 жылдан бері тұрақты түрде өткізіліп келеді. Қазірге дейін барлығы 14 құрама жеңімпаз тұғырына көтерілді. Олардың қатарында Норвегия мен Ресей 4, КСРО, ГДР 3, Франция 2, Венгрия, Югославия, Дания, Румыния, Нидерланд, Чехословакия, Германия, Оңтүстік Корея, Бразилия 1 мәрте алтын медальге ие болды.