8 өнер қайраткері «Қазақстанның халық әртісі» құрметті атағымен марапатталды.
Қазақстан Республикасы Президентінің өкімімен 2023 жылы 75 әдебиет және өнер қайраткеріне мемлекеттік стипендия тағайындалды, деп хабарлайды Skifnews.kz ақпарат порталы.
Бүгін Алматы қаласында Мәдениет және ақпарат министрі Аида Балаеваның қатысуымен аталған стипендияны тапсыру рәсімі өтті.
Өткен жылы Президент Жарлығымен ел дамуына елеулі үлес қосқан 6 қаламгер «Қазақстанның халық жазушысы» атағымен, 8 өнер қайраткері «Қазақстанның халық әртісі» құрметті атағымен марапатталды. Жыл сайын «Umai» және «Айбоз» әдеби-мәдени ұлттық сыйлықтары, «Дарын» мемлекеттік жастар сыйлығы беріледі.
Мәдениетаралық және этносаралық бірлікті нығайту бойынша былтыр алғаш рет ұйымдастырылған әдебиет және журналистика саласындағы 11 үздік жұмысқа арнайы сыйлық берілді.
Биыл Жошы Ұлысының құрылғанына 800 жыл, тарихшы Мұхаммед Хайдар Дулатидің 525 жылдығы, ғалым Қаныш Сәтбаевтың 125 жылдығы, жазушы Әбдіжәміл Нұрпейісов, Халық қаһарманы Рақымжан Қошқарбаев пен Сағадат Нұрмағанбетовтің 100 жылдықтарын және басқа да тұлғаларымыздың мерейтойларын аталып өтіледі.
Министр ақын-жазушылар мен әдебиеттанушыларға, драматургтер мен публицистерге, театр, кино және балет актерлеріне, қолөнершілер мен өзге де мәдениет майталмандарына стипендия табыс етті.
Мәдениет саласындағы стипендия Асанәлі Әшімов, Мырзатай Жолдасбеков, Бибігүл Төлегенова, Олжас Сүлейменов Иранбек Оразбаев, Нұрғали Нүсіпжан, Тұңғышбай Жаманқұлов, Меруерт Өтекешова, Амандос Ақанаев, Дулат Исабеков, Төлен Әбдік, Әкім Тарази, Гульвер Разиева және басқа да қазақ әдебиеті мен өнерінің майталмандарына табысталды.
Сонымен қатар Канн халықаралық фестивалінің лауреаты Самал Есләмова, скрипкашы Еркебұлан Сапарбаев, суретші Ренат Елубаев, әншілер Андрей Трегубенко, Назым Сағынтай, актер Максим Ященко секілді және өзге де жас дарындарға мемлекеттік қолдау көрсетілді.