«Жаңа адамдар» букмекерлік кеңсенің жарнамасын «шындық баннерімен» жауып тастады

«Жаңа адамдардың» «Ставки на стоп» жобасы Астанадағы танымал букмекер кеңсесінің жарнамалық баннерін құмар ойындарының барлық көрінісін ашатын өздерінің «шындық баннерімен» жауып тастады, деп хабарлайды Skifnews.kz ақпарат порталы.

Статистика бойынша, құмар ойынға тәуелді адамдардың 40% отбасынан айрылса, 20% түрлі қылмыстар жасауға барады. Әдеттегі құмар ойыншының орта есеппен қарызы 10 миллион теңгені құрайды. «Букмекер кеңселерінің шынайы жарнамасы осылай болу керек» деп есептейді олар.

Қазақстандықтар құмар ойындарға өз денсаулығына қарағанда екі есе көп қаржы жұмсайды екен. Небәрі соңғы үш айдың ішінде Қазақстан азаматтары жүз миллиардқа жуық теңгеге ұтылып қалған. Соңғы бірнеше жылда елімізде құмар ойындар нарығы үш есеге дейін өсіп,  қоғамның басты әлеуметтік ауруларының бірі лудомания кең етек жайып жатыр. Лудомания отбасыларды бұзады, халықты перманентті экономикалық және тұлғалық кризиске ұшыратып, басқа да тәуелділік түрлеріне, атап айтқанда, маскүнемдік, есірткіге тәуелділік, селфхарманы қоздырып, өзін-өзі өлтіруге дейін алып келеді.

Адамдар оңай жолмен байып кететініне сенгісі келеді. Сондағысы, «сәтті түседі» деген бір ойын. Букмекерлер халықтың осы қалауын өз мақсатына пайдалануға тырысады. Яғни, тез ұтыс және сансыз ақша уәделерімен өзіне тартады, ұтыс тігудің зияндарын айтпай, тек әлеуетті артықшылықтарын алға тартады. Бұл – әділетсіздік. Жай ғана алдау.

Қазір елімізде букмекерлік кеңселердің жарнамасын шектеу туралы заң талқыланып жатқанын білеміз. Осы алдаумен бар күшімізбен күресіп, адамдарды бұл қауіпті тәуелділіктен алып шығу маңызды. Бір нәрсені түсінуіміз керек: букмекерлік кеңселердің қулығына түсіп қалмау үшін тез әрі оңай жолмен келетін ақшаға сенуді тоқтату керек. Байлыққа жетудің оңай жолы жоқ. Біздің өзіндік шығармашылығымыз, еңбексүйгіштік пен прагматизм – міне, нағыз байлыққа жету жолдары. Шындыққа тура қарай білейік. Букмекерлердің құрығына түспеудің жалғыз жолы - оңай шешімдерге сенуді тоқтату, - деді «Жаңа адамдар» белсендісі Ғарифоллаев Мейіржан.