Билеттерді заңсыз cату ісіне байланысты Алматыда вокзал басшысы жұмыстан шеттетілді

"Алматы-1" вокзалының басшысы жеке кассада заңсыз билет сату фактісіне қатысты тергеу басталғанша қызметінен уақытша шеттетілді. Оның атқаратын қызметіне сәйкестігі мәселесі қаралып жатыр, деп хабарлайды Skifnews.kz ақпарат порталы Stan.kz-ке сілтеме жасап. 

Станция бастығының аты-жөні көрсетілмеген. Ашық дереккөздерде де бұл мәселе бойынша соңғы ақпарат жоқ. Алайда 2022 жылдың ақпан айындағы жағдай бойынша ол Айдын Жамансаринов болды. Бұл адамның қазір қайда жұмыс істейтіні туралы да ақпарат жоқ.

“Қазақстан Темір жолы” компаниясы жолаушылардан билеттерді заңсыз қайта сату туралы бірнеше рет шағым түскендіктен, өз бетінше тексеру жүргізгенін түсіндірді. Теміржол билеттерінің жасанды тапшылығын туғызу фактілері анықталды.

"Билеттерді қайта сату схемасына жеке касса қызметкерлері мен олардың делдалдары тартылды. Жеке кассаның жұмысы тоқтатылды", – делінген хабарламада. 

Тергеу материалдары қазір құқық қорғау органдарына берілді. Мұндай тексерулер еліміздің барлық вокзалдарында да жүргізілетіні нақтыланды.

Маусым айының ортасында көлік министрі Марат Қарабаев “Қазақстан Темір жолы” жолаушылар тасымалы жақсы нәтиже көрсетуі үшін билет бағасын үш есеге көтеру керегін айтты. Оның айтуынша, мемлекет салық төлеушілердің ақшасымен ұлттық компанияны субсидиялауға мәжбүр.

Сондай-ақ Қарабаев Қазақстандағы жолаушылар тасымалының сапасы жақын арада жақсарады деп уәде берген еді.