Қазақстанда ұшақтар неліктен уақытылы ұшпайды?

Қазақстанда рейстер неліктен кешігеді. Бұл туралы бүгін Үкіметте жиынында ҚР Көлік министрі Марат Қарабаев айтты, деп хабарлайды Skifnews.kz ақпарат порталы.

Соңғы үш жылда әуе жолаушыларының саны 20%-ға артқан. Сәйкесінше әуежай инфрақұрылымын соған лайықтап даярлау қажет. Қазір елдің 6 әуежайында жөндеу жұмыстары жүргізіліп жатыр, қыркүйек айының соңында аяқталмақ.

«Инфрақұрылымды дайындау бойынша құрылыс-монтаж жұмыстары жаз мезгілінде жүргізіледі. Өкінішке қарай, маусым қысқа. Бұның бәрі ұшақтардың ұшуына, кешігуіне әсер етеді», - деді Қарабаев.

Астана әуежайының ұшу-қону жолағы 20 жыл жөнделмеген. Кешкі 22:00-ден таңғы 06:00 дейін ұшу-қону жолағы жабылады. Сондықтан әуежайға күндіз жүктеме артады. Одан бөлек ауа-райы да рейстердің кешігуіне әсер етеді.

«Әуежайлардың жауапкершілігі заңда қарастырылмаған. Қазір рейстердің кешіккені үшін әуе компаниясына айыппұл салынса, енді жаңа механизм бойынша олардың бірінші басшыларына айыппұл салынатын болады», - деді министр.