Қазақстанның көк туы Нью-Йоркте төрінде биікке көтерілді (ВИДЕО)

Республика күнін мерекелеу аясында Нью-Йорк мэрі Эрик Адамс қаланың орталық ауданы Манхэттенде Қазақстанның мемлекеттік туын көтерудің салтанатты рәсіміне қатысты.

Фото: Видеодан алынған кадр

Нью-Йорк басшысы өзінің құттықтау сөзінде шараға қатысушыларды жылы лебізін білдіріп, екі ел арасындағы достықты атап өтті, деп жазады Skifnews.kz ақпарат порталы.

Мэр Э. Адамсқа алғысын білдірген Нью-Йорктегі ҚР Бас консулы Раушан Есболатова ұлттық мереке – Республика күнінің тарихи маңызына тоқталды. Қазақстандық дипломат осыдан отыз жылдан астам уақыт бұрын, 1990 жылдың дәл осы күні Қазақстан мемлекеттік егемендік туралы декларацияны қабылдағанын, бұл еліміздің Тәуелсіздік жолындағы алғашқы қадамы болғанын атап өтті.

«Ту көтеру – маңызды оқиғаларға арналған ерекше рәсім. Елімнің көкте желбіреген туы отандастарымызға ерекше сезiм сыйлайтыны сөзсіз», – деп түйіндеді сөзін ҚР Бас консулы.

Салтанатты шараға бизнес қауымдастық, дипломатиялық корпус өкілдері, қаланың құрметті азаматтары мен қонақтары қатысты.