Қызылорда әкімдігі жол жөндеу барысында заң бұзған

Қызылорда қаласы әкімдігі тарапынан тиісті хабарлама жібермей жол жөндеу жұмыстарын бастағаны анықталды, деп хабарлайды Skifnews.kz ақпарат порталы. 

Прокуратура мәліметінше, құрылыс-монтаждау жұмыстарын жүргiзу басталғанға дейiн тапсырыс берушi мемлекеттiк сәулет-құрылыс бақылауын жүзеге асыратын органдарға «Рұқсаттар және хабарламалар туралы» Заңда белгiленген тәртiппен құрылыс-монтаждау жұмыстарын жүргiзу жөнiндегi қызметтi жүзеге асырудың басталғаны туралы хабар беруге мiндеттi («Қазақстан Республикасындағы сәулет, қала құрылысы және құрылыс қызметі туралы» Заңның 68-бабы 12-тармағы).

«Қала әкімдігі Қызылорда облысының бақылау жөніндегі басқармасына тиісті хабарлама берместен 4 көшеге жөндеу жұмыстарын бастаған.

Прокурорлық қадағалау актісін қарау нәтижесінде лауазымды тұлғалар Әкімшілік құқық бұзушылық туралы кодекстің 463-бабының 1-бөлігімен кінәлі деп танылып 25 АЕК мөлшерінде әкімшілік айыппұл салынды», - делінген прокуратура хабарламасында.