АҚШ-тың бұрынғы президенті Джимми Картер өмірден озды

АҚШ-тың бұрынғы президенті Джимми Картер жексенбі, 29 желтоқсанда Джорджиядағы үйінде өмірден өтті. Джимми Картер 100 жасында қайтыс болды, деп хабарлайды Sкifnews.kz ақпарат порталы.

The Washingtin Post басылымының жазуынша, Картердің қайтыс болғанын ұлы кіші Джеймс Картер мәлімдеді. Өлімнің нақты себебі белгісіз, дегенмен басылымның жазуынша, соңғы жылдары АҚШ-тың бұрынғы басшысы меланоманың агрессивті түрі – тері қатерлі ісігінен емделген. 2023 жылы емді тоқтатып, қалған уақытын үйде хоспис қарауында өткізетіні хабарланған еді.

1 қазанда Картер көпшілік алдында соңғы рет шыққан. Сол кезде ол отбасымен және достарымен 100 жасқа толуына орай авиациялық шоуды тамашалаған еді. Джимми Картердің артында төрт баласы, 11 немере және 14 шөбересі қалды. Джимми Картер шағын қалада дүниеге келген.

 Ол 1971 жылдан 1975 жылға дейін Джорджия губернаторы болды және 1977 жылдан 1981 жылға дейін АҚШ президенті қызметін атқарды.

Отставкаға кеткеннен кейін Картер қайырымдылық шараларымен және гуманитарлық жобалармен айналысты, ал 2002 жылы "халықаралық қақтығыстарды бейбіт жолмен шешуге, демократия мен адам құқықтарын ілгерілетуге, экономикалық және әлеуметтік дамуды ынталандыруға бағытталған тынымсыз еңбегі" үшін Нобель сыйлығының лауреаты атанды.