Оның қолында әзірге телефон жоқ.
Ақтөбелік дәрігерлер кепілде болған әйелді емдеу шарасын жалғастырып жатыр. Әзірге науқасқа телефонын бермеген, ол ата-анасының көз жұмғанын білмейді, деп хабарлайды Skifnews.kz ақпарат порталы. ҚазАқпарат мәліметінше, дүйсенбінің түнінде кепілде болған 40 жастағы әйел енді-енді ес жиып, жан-жағын таныды. Науқасты Ақтөбе облыстық көпсалалы ауруханасының нейрохирургтары мен травматологтары емдеп жатыр.
"Ем жүргізіліп жатқанына бір тәуліктен асты. Оған бас-ми жарақаты, мидың шайқалуы диагнозы қойылған. Ал травматологтар жарақатын таңып береді. Екі бөлім жауапты болғанымен, нейрохирургияда емін жалғастырады. Көгерген, жырылған жерлері бар. Бүгінгі таңда жағдайы орташа. Сана-сезімі ашық. Сұрақтарға нақты жауап береді. Бүгін не болғанын сұрады. Ол ата-анасының қайтыс болғанын білмейді. Жағдайдың қалай болғанын, не болғанын білгісі келді. Біз ол туралы емес, денсаулығы туралы көбірек айтамыз. Төсектен тұруға болмайды. Жүруге рұқсат еткен жоқпыз. Оның қолында әзірге телефон жоқ. Психологтар да кеше де, бүгін де кездесті. Мұндай диагнозбен 5-7 күн ем алады. Бірақ әрі қарай белгілі болады. Себебі психологиялық жағдайы ескеріледі. Қазір күзет тұр", - деді Нейрохирургия бөлімінің меңгерушісі Мақсат Уразжанов.
Еске салсақ, 13 қаңтар күні түнде Ақтөбеде түнде 75 және 67 жастағы қос қария көз жұмды. Ал тірі қалған 40 жастағы әйел ауруханада ем алып жатыр.