«Сабақ болады»: Абзал Құспан арабша жазылған туға қатысты дауға пікір білдірді (ВИДЕО)

Мәжіліс депутаты Абзал Құспан әлеуметтік желіде тараған, Қазақстан туында арабша жазуы бар суретке түскен төрт қызға қатысты өз пікірін білдірді, деп хабарлайды Skifnews.kz ақпарат порталы.

Қыздар әкімшілік жауапкершілікке тартылды. Қылмыстық іс қозғау үшін төрт негізгі құрам болуы керек: қылмыстың объектісі, объективті жағы, субъектісі және субъективті жағы. Егер қарапайым тілмен түсіндірсек, олардың бұл әрекетті саналы түрде, әдейі жасағаны дәлелденуі қажет. Алайда мен істің мән-жайын толық білмеймін. Бастапқыда іс қылмыстық сипатта қарастырылған еді, – деді депутат.

Оның айтуынша, бұл істе кінәлі тұлғалар анықталмаған.

БАҚ-та жарияланған ақпараттарға сүйенсек, қылмыс белгілері табылмады. Себебі аталған сурет Wildberries платформасы арқылы тараған, яғни қыздар оны өздері жасамаған деген мәлімет шықты. Демек, олардың қылмыстық ниеті болмаған. Бұл ту басқа елде өндіріліп, сатылған деген ақпарат бар, – деп түсіндірді Құспан.

Депутат бұл жағдайдың ауыр немесе жеңіл екенін сот қана шеше алатынын айтты.

"Дегенмен, бұл оқиға болашаққа үлкен сабақ болатыны анық. Бір жағынан, бұл азаматтардың құқықтық сауаттылығының төмендігін көрсетеді. Ендігіде осындай жағдайлар қайталанбайды деп ойлаймын. Әлеуметтік желілер мен БАҚ-та бұл мәселенің кеңінен талқылануы – үлкен тәжірибе болды, – деді мәжілісмен.

Сөзінің соңында Абзал Құспан егер осындай әрекеттер әдейі, қасақана жасалса, қылмыстық жауапкершілікке тартылуы мүмкін екенін атап өтті.