Трамп барлық тауарға баж салығын енгізді: Бұл Қазақстанға қалай әсер етеді?

АҚШ президенті Дональд Трамп шетелден келетін барлық тауарға баж салығын енгізетінін мәлімдеді. Бұл шешім 2 сәуірде Ақ үйде өткен баспасөз мәслихатында жарияланды, деп хабарлайды Skifnews.kz порталы.

Трамп Truth Social желісіндегі парақшасында баж салығы енгізілетін 185 елдің тізімін жариялады. Жаңа тарифтердің базалық мөлшері 10% деп белгіленгенімен, көптеген елдер үшін бұл көрсеткіш одан да жоғары болып отыр.
- Қазақстаннан келетін тауарларға баж салығы – 27%
- Қытай – 34%
- Еуропалық Одақ елдері – 20%
- Швейцария – 31%
- Ұлыбритания – 10%
- Израиль – 17%
Ең жоғары баж салығы:
- Вьетнам – 46%
- Камбоджа – 49%
- Лаос – 48%

Ал Ресей, Канада, Беларусь, Иран бұл тізімге енбеген. Украинадан келетін тауарларға 10%-дық сауда салығы енгізілді. Посткеңестік елдердің көпшілігі үшін 10% мөлшерлеме бекітілді, бірақ Қазақстан мен Молдова үшін тарифтер жоғары болып отыр.

Трамп бұл бастаманы «Америка өнеркәсібінің қайта жандануы» деп атап, жаңа тарифтер АҚШ экономикасын жандандырып, ұлттық қарызды азайтуға және салықтарды төмендетуге мүмкіндік беретінін айтты. Оның айтуынша, баж салығының енгізілуімен АҚШ экономикасы «алтын ғасырға» аяқ басады.

Сонымен қатар:
- Импортталатын автокөліктер мен бөлшектерге – 25% баж салығы енгізіледі.
- Жалпы 10%-дық базалық баж 5 сәуірден бастап, кейбір елдер үшін 9 сәуірден бастап күшіне енеді.
Қазақстанға әсері қандай?

Қазақстандық экспорттаушылар үшін АҚШ нарығына тауар тасымалдау қымбаттайды. Бұл экспорт көлемінің азаюына және америкалық нарықтағы бәсекеге қабілеттіліктің төмендеуіне алып келуі мүмкін. Сарапшылардың пікірінше, бұл қазақстандық тауар өндірушілер үшін жаңа қиындықтар тудыруы мүмкін, бірақ сонымен бірге басқа нарықтарды іздеуге мүмкіндік береді.

Трамптың бұл шешімі АҚШ-пен сауда жасайтын көптеген елдер үшін үлкен өзгерістер әкелетіні анық. Енді Қазақстанға бұл жағдайға бейімделу қажет. Бұдан былай АҚШ-пен сауда жасауда жаңа стратегиялар әзірлеу маңызды болмақ.