Батыс Қазақстанда бес баласы өрттен қаза тапқан отбасына үй беріледі

Күні кеше Сырым ауданында қайғылы жағдай орын алып, бір үйдің бес баласы бірдей өрттен көз жұмған болатын. Бүгін Батыс Қазақстан облысының әкімі Нариман Төреғалиев қара жамылған отбасы баспанамен қамтамасыз етілетінін айтты, деп хабарлайды Skifnews.kz ақпарат порталы.

«Сырым ауданында қаза тапқан балалардың ата-аналары мен жақындарына қайғыларына ортақтасып, көңіл айтамын. Менің тапсырмам бойынша оқиға орнына орынбасарым барды, аудан әкімі оқиға орнында, барлық қажетті қызметтердің жұмысын үйлестіріп жатыр. Әкімдік тарапынан барлық қажетті көмек көрсетіледі: жерлеу рәсімін ұйымдастыру, психологиялық көмек көрсету, баспанамен қамтамасыз ету және өзге де әлеуметтік қолдау шаралары. Қазіргі уақытта оқиға орнында ТЖД мамандары, полиция департаментінің қызметкерлері, медицина қызметкерлері және басқа да тиісті қызмет өкілдері жұмыс істеуде. Жағдай менің жіті бақылауымда», - деп жазды әкім желідегі парақшасында.