БҚО-да бұрын сотталған ер адам 6 жасар қызды ұрлап, зорлады деген күдікке ілікті

Батыс Қазақстан облысында елді дүр сілкіндірген ауыр қылмыс тіркелді. Бұрын сотталған ер адам 6 жасар қызды алдап алып кетіп, оны зорлады деген күдікке ілінді, деп хабарлайды Skifnews.kz ақпарат порталы.

Қызды алдап алып кеткен

Полицияның ресми ақпаратына сәйкес, күдікті қыздың анасымен бұрыннан таныс болған. Ол әйелдің сеніміне кіріп, «қызыңа балмұздақ алып беремін» деп ұсыныс жасаған. Анасы бұл адамға сеніп, қызын жібере салған. Алайда қыз үйге бірнеше сағат бойы оралмаған. Осы кезде ата-анасы алаңдап, полицияға хабарласуға мәжбүр болды. Іздестіру жұмыстары бірден басталған.

Күдікті бір күннен кейін ұсталды

«Жүргізілген жедел-іздестіру шараларының нәтижесінде 32 жастағы ер адам ұсталды. Ол қыздың қайда екенін көрсетті. Бала кенттің шет жағынан табылды. Оған медициналық және психологиялық көмек көрсетілді», – деп хабарлады БҚО Полиция департаментінің баспасөз қызметі.

Қыз аман табылғанымен, жергілікті typicaluralsk басылымы мәліметіне сүйенсек, ол зорлықтың құрбаны болған. Бұл жағдай жұртшылық арасында ашу-ыза тудырып, қоғамда қызу талқыға түсті.

Бұрын сотталған

Белгілі болғандай, күдікті шамамен екі жыл бұрын ғана түрмеден босаған. Ол ұрлық жасағаны үшін сотталған және жазасын өтеп шыққан. Бірақ түрмеден шыққаннан кейін қайтадан ауыр қылмысқа барған деген күдікке ілікті. Құқық қорғаушылардың айтуынша, мұндай жағдай қылмыскерлердің бостандыққа шыққаннан кейінгі бақылау жүйесінің әлсіздігін де көрсетеді. Қоғам белсенділері мен сарапшылар балалар қауіпсіздігіне байланысты қатаң шараларды талап етіп отыр.

Қоғамдық резонанс

Бұл оқиға әлеуметтік желілерде үлкен талқыға түсті. Көпшілік ата-аналарға сақ болуды ескертіп, балаларын бөтен адамға сеніп қалудан қорғау керектігін жазып жатыр. Сондай-ақ, ауыр қылмыс жасағандарға қатысты жазаны күшейту, олардың қайда жүргенін бақылау мәселесі көтерілді. Қазір күдікті уақытша ұстау изоляторына қамалды. Тергеу амалдары жалғасып жатыр.