Адамды қор қылатын жүйе.
Қазақстанда мүмкіндігі шектеулі жандарға жасалып отырған әділетсіздік қоғамның ашуын тудырды, деп хабарлайды Skifnews.kz ақпарат порталы.
Әлеуметтік желіде тараған бейнежазбада азаматтар медициналық-әлеуметтік сараптама комиссиясының жұмысын қатаң сынға алды. Айтуларынша, бірінші топтағы мүгедектерге екінші топты ғана беріп, мерзімсіз мүгедектік алу мүлде мүмкін емес. «Дәрігерлер жаңа аяқ, жаңа қол өсіп шығады деп сенетін сияқты» – дейді олар.
Бір әйелдің айтуынша, ағасы бір аяғынан айырылса да, жыл сайын комиссияға барып, «мүмкін жаңа аяқ өсіп шыққан шығар» дегендей қайта дәлелдеуге мәжбүр. «Бұл қорлау емес пе? Әр барған сайын жүйкең тозып, денсаулығың одан сайын нашарлайды», – деп ашынды ол.
Тағы бір тұрғын болса: «Айқай-шусыз төсек тартып жатқан науқасқа арба әперу мүмкін емес. Комиссия “жата берсін, неге тұруы керек” дейді. Сонда ол адам далаға қалай шығады?!» – деп қынжылды.
Желі қолданушылары да қолдау білдіріп жатыр:
«Адамды қор қылатын жүйе», «Мүгедектерді мазақ қылуды тоқтатыңдар», «Әділетсіздікке төзуге болмайды», – деген пікірлер қарша борады.
Бұдан бөлек, 2006 жылы жол апатынан кейін мүгедек болған қыздың анасы да басынан өткен қиындықты баяндады. «Дәрігерлер үйге келіп тексеруге ерінетін. Оларды таксимен тасып, мыңдаған теңге мен уақыт жоғалттық. Сұрақ қойсаң – жауап жоқ, үндемесең – мүгедектігіңнен айырыласың. 19 жыл өтті, ештеңе өзгерген жоқ», – деді ол.
Бұл бейнежазба әлеуметтік желіде үлкен резонанс тудырып, халық биліктен әділдік талап етіп отыр.