"БАД-тар ешқашан дәрінің орнын баса алмайды".
Қазақстанда дәрігерлер мен қоғам белсенділері арасында қызу талқылауға түскен жағдай орын алды, деп хабарлайды Skifnews.kz ақпарат порталы.
Әлеуметтік желіде 7 жасар балаға қойылған диагноз бен тағайындалған емдеу парағы жарияланып, жұрттың ашу-ызасын тудырды. Құжатқа сәйкес, балаға «манифестік гипотиреоз» диагнозы қойылған. Бұл – өте қауіпті эндокринологиялық ауру. Бала ағзасында қалқанша безінің гормондары мүлде жетіспейді. Зерттеу нәтижесі бойынша, ТТГ деңгейі 231 мкМЕ/мл болған – бұл қалыпты көрсеткіштен ондаған есе жоғары. Мұндай жағдайда шұғыл түрде Тироксин сияқты негізгі дәріні беру – халықаралық стандарт бойынша міндет. Алайда тағайындалған «ем-домда» ең қажетті дәрі жоқ болып шықты. Оның орнына балаға ондаған БАД (биологиялық белсенді қоспа), витаминдер мен ректальді шамдар жазылған. Олардың қатарында қара зере майымен жасалған шамдар да бар. Дәрігерлер мұны баланың денсаулығына ашық түрде зиян келтіру деп бағалады.
Эндокринологтар:
«Бұл – балаға қастандық жасаумен тең. Тироксинсіз гипотиреоздың салдары ауыр, тіпті қайғылы болуы мүмкін. Ал БАД-тар ешқашан дәрінің орнын баса алмайды» – деп қатаң мәлімдеді.
Дәрігерлер тек медициналық емес, заңнамалық шара қабылдауды талап етіп отыр. Олар осындай «интегративті медицина» атын жамылған орталықтарды тексеріп, лицензиясынан айыру керек дейді.
«Алматыда дәл осындай жағдайдан бала көз жұмғаны әлі есімізде. Бір өлім аз ба?!» – деп ашынды медицина қауымдастығы.
Әлеуметтік желідегі пікірлер де толқып тұр:
«Metabody-ды жабатын уақыт келді!» – «Бала – ақша табудың құралы емес!» – «Тәжірибесіздердің қолында балалардың өмірін құртып жатыр!».
Бұл жағдай көп ата-аналарға да ой салды. Мамандардың айтуынша, қандай «альтернативті ем» ұсынылса да, ең әуелі дәлелді медицинаға жүгіну қажет.
Өйткені баланың өмірі – тәжірибе жасайтын алаң емес, ол – ең қымбат құндылық.