Балаларға аударылатын қаражат сомасы келесі жылдың қаңтарында белгілі болады.
Ұлттық банк төрағасы Тимур Сүлейменов 2026 жылы Ұлттық қордан балаларға төлем жасауға қатысты пікір білдірді, деп хабарлайды Skifnews.kz ақпарат порталы.
Ұлттық банкте өткен брифингте БАҚ өкілдері кейбір сарапшылардың биыл Ұлттық қордың табысы жоқ екенін алға тартып отырғанын айтқан еді.
— Мұны айтып отырған қандай сарапшы екенін білмеймін. Ұлттық банк Ұлттық қорда басқара отырып, 7 айдың қорытындысында 4,6 млрд доллар табыс тапты. Кірістілік долларға шаққанда 8 пайыз болды, - деді ол.
Сонымен қатар оның айтуынша, инвестициялық кіріс бойынша да шығын жоқ.
— Керісінше үшінші жыл қатарынан Ұлттық қорды басқарудан лайықты инвестициялық табыс алып отырмыз. Бұл қорға активтерін ұлғайтуға мүмкіндік береді, - деді ҰБ төрағасы.
Осы орайда Тимур Сүлейменов келесі жылы балаларға Ұлттық қордан қанша қаржы аударылатындығы әзірше белгісіз екенін айтты. Барлығы да бала туу көрсеткішіне, жыл соңында қанша баланың 18 жасқа толатынына және басқа да факторларға байланысты. Балаларға аударылатын қаражат сомасы келесі жылдың қаңтарында белгілі болады.