Алаяқтардың жаңа айласы: 300 мыңға кредитке алған жаңа телефон — ұсталған боп шықты

Қазір қазақстандықтардың көбісі смартфонды интернет-дүкендерден, әлеуметтік желідегі жарнамаларға сеніп сатып алып жүр, деп хабарлайды Skifnews.kz ақпарат порталы.

Өкінішке қарай, осындай «жеңіл жол» кейде адамдарды үлкен шығынға батырып жатыр. Соның бір дәлелі – елорда тұрғынының оқиғасы. Ол ресми дүкен емес, сайттағы «жарқыраған» жарнамаларға сеніп, 300 мың теңгеге несиеге жаңа телефон сатып алады. Сырт көзге бәрі мінсіз: қорабы бүтін, құжаттары бар, жеткізіп берген курьер де күдікті көрінбеген. Қарапайым сатып алушы үшін телефонның шын мәнінде жаңа ма, әлде ұсталған ба – бірден ажырату мүмкін емес. Бірақ қуаныш көпке созылмайды. Балалары телефонның жұмысында біртүрлі ақаулар барын байқап, маманға көрсеткенде ғана шындық ашылады.

«Жаңа» деп алған смартфон бұрын қолданылған, яғни ұсталған болып шығады. Бұл жағдай тек бір отбасының емес, мыңдаған қазақстандықтың басынан өтіп жатқан мәселе. Мамандар соңғы жылдары алаяқтардың жаңа айласы көбейіп кеткенін айтады: біріншіден, олар телефонды арнайы қайта қаптап, сыртын мінсіз етіп көрсетеді; екіншіден, сатып алушыға «отзыв», «гарантия бар» деген сияқты сөздермен сенім ұялатады; үшіншіден, несиелік сатып алуды ұсынып, адамды тәуекелге итермелейді. Басты проблема – халықтың қаржылық және тұтынушылық құқықтық сауатының төмендігі.

Көптеген адам: – «Қорабы бар ғой, демек жаңа», – «Сайтта жақсы пікір жазылған, сондықтан алсам болады», – «Кредитке рәсімделген телефонда ештеңе болмайды» деген ойға сенеді. Ал алаяқтар дәл осы әлсіз тұсты пайдаланады. Ең қауіптісі – мұндай жағдай тек қалтаға емес, жүйкеге де соққы береді. 300 мың теңге аз ақша емес, ол үшін кей отбасы айлар бойы жұмыс істейді. Ал «жаңа» деп алған дүниесінің қолдан шыққаны жанға қатты тиеді.

Маман кеңесі:

1. Смартфонды тек ресми дүкеннен немесе сенімді серіктестерден алыңыз.

2. Қолданылған-ұсталмағанын арнайы сервисте тексертіп көріңіз.

3. Бейтаныс сайттағы «жақсы отзывдарға» алданып қалмаңыз – көбісі қолдан жасалған.

4. Егер алданып қалсаңыз, міндетті түрде полицияға арыз жазыңыз. Алаяқтардың айласы жылдан-жылға өзгеріп келеді. Бұрын көшеде арзан бағаға сатып алатын болса, қазір интернет арқылы «жаңа» атын жамылып, қолдан шыққан телефондарды өткізіп жүр.