Ал жаңа мектептер мен балабақшалар халық тығыз қоныстанған аудандардан шетке ығысып барады.
Қазақстанда соңғы жылдары мектеп пен балабақша салынуы тиіс жер телімдері жеке компаниялардың меншігіне өтіп, сауда және ойын-сауық орталықтарына айналған жағдайлар жиілеп барады. Мәжілістегі Құрылыс кодексін талқылау кезінде бұл мәселе ашық көтерілді, деп хабарлайды Skifnews.kz ақпарат порталы.
Депутаттардың айтуынша, қала жоспарларында (ПДП) әлеуметтік нысандарға арналған деп көрсетілген жерлер кейін тұрғын үй, дүкен немесе түнгі клуб салуға пайдаланылып жатыр. Ал жаңа мектептер мен балабақшалар халық тығыз қоныстанған аудандардан шетке ығысып барады.
«Кейбір әкімдіктер инвестордың өтінішін сылтауратып, мектепке бөлінген жердің мақсатын өзгертеді. Ал сол маңайдағы балаларға оқу орны жетпей, ата-аналар таңертең көлікпен басқа ауданға тасуға мәжбүр. Бұл — мемлекеттік жоспарлауға жасалған опасыздық!» — деді депутаттар.
Олардың айтуынша, мұндай әрекеттердің артында пайда қуған құрылыс компаниялары мен жергілікті билік өкілдерінің өзара келісімі тұруы мүмкін.
«Мектептің орнына мейрамхана, балабақша орнына түнгі клуб салу — ұлтқа жасалған қиянат. Баланың білім алатын орны — бизнес нысанына айналмауы тиіс!» — деді Мәжіліс мүшелері.
Депутаттар Үкіметке нақты талап қойды:
• әлеуметтік нысандарға арналған жердің нысаналы мақсатын өзгертуді заңмен тыйым салу;
• егер өзгеріс қажет болса, тек дәл сол ауданда, 100 метр қашықтықтан аспайтын аумақта баламалы жер телімін бөлуді міндеттеу.
«Бүгінгі тәртіп бойынша, мектеп орнына үй тұрғызылып, ал мектеп қаланың шетіне салынады. Бұл – логикаға сыймайтын шешім. Халықтың мүддесін аяққа таптау!» — деді депутат.
Сонымен қатар, депутаттар әлеуметтік жерлерге байланысты шешімдердің барлығын ашық түрде жүргізіп, қоғам өкілдерін талқылауға қатыстыруды ұсынды.
«Біз халықтың көзін алдауға жол бермеуіміз керек. Әлеуметтік нысанның орнына бизнес нысаны салынса, бұл – тікелей жемқорлықтың көрінісі. Ондай шешім қабылдағандарға нақты жаза болуы тиіс», – деді ол.
Парламент мүшелері бұл түзетулерді екінші оқылымда заңға енгізуді талап етті.
«Бұл мәселе – жай ғана құрылыс емес, бұл – әділет пен ардың мәселесі. Мектеп пен балабақшаға арналған жер – ұрпақтың құқығы. Оны ешкімнің жеке бизнесіне айналдыруға болмайды!» — деді депутат сөзін қорытындылай келе.