«Мүгедектерді Алла жазалады»: Шенеунік айтқан сөзі үшін кешірім сұрады

“Мүгедектерді онсыз да Алла жазалады” деп сынға қалған Алматы облысы әкімінің бірінші орынбасары Қанат Есболатов бұл сөзі үшін көптен кешірім сұрады. Айтуынша жиын кезінде қателесіп ойын дұрыс жеткізбеген, деп хабарлайды Sn.kz ақпарат порталы. 

Ол өз инстаграм парақшасында жазба жариялап, жағдайды түсіндірді. 

“Әлеуметтік желіде тараған видеоға қатысты ақпарат беруді жөн деп санаймын. Денсаулық сақтау министрімен Талғарда өткен кездесуге қалың жұрт жиналды. Әрқайсысы өзекті мәселе көтеріп, сұрақ қоюға асықты. Сондықтан кезек те үлкен болды. Регламент бойынша кездесуге екі сағат бөлінген еді. Бірақ, сұрақтардың көп болуына байланысты жиын шамамен 4 сағатқа созылды. 

Келген азаматтардың арасында бірқатар мүмкіндігі шектеулі жан болды. Кейбірі тік тұрып, өз кезегін күтті. Кезегі жеткенде залдағы бірнеше адам сөзін бөліп, оған кедергі жасай бастады. Регламентті сақтауға шақырдым. Алайда орыс тілінде айтқан сөзімде қателік бар. Ойымды дұрыс жеткізбеппін. “Құдай үлкен сынақ берген” деп айтпақ болғанмын”, – деп тұсіндірді ол. 

Қанат Есболатов өзгелерді ерекше қажеттілігі бар адамдарға құрмет көрсетуге шақырды. 

“Айтқан сөзім көпшіліктің көңіліне, тіпті намысына тигенін де түсіндім. Осы үшін шын ниетіммен кешірім сұраймын. Ауқымды іс-шараларда алдымен егде жастағы тұрғындарға және мүмкіндігі шектеулі азаматтарға жол беру маңызды. Қай жиын болмасын, оларды көп күттірмей, кезексіз тыңдау – дұрыс әрі адамгершілікке сай деп есептеймін”, – деді ол.