Қарағандыда әдейі жолға жүгіріп шығатын алаяқтар көбейді (ВИДЕО)

Қарағандыда көліктің бейнетіркеуі жол-көлік оқиғасын қолдан ұйымдастыруға ұқсайтын жағдайды анық жазып алған. Бейнежазбада ер адам қозғалып келе жатқан машинаның жолын екі рет әдейі бөгеуге тырысқаны айқын көрінеді, деп хабарлайды Sn.kz ақпарат порталы.

Оқиға түнде, көлік қозғалысы сирек уақытта орын алған. Жүргізуші дер кезінде тежеп, ықтимал соқтығыстан құтылғанымен, жаяу адамның әрекеті әдейі жасалғаны бірден байқалады.

Желі қолданушыларының айтуынша, оқиға орнынан шамамен елу метрдей жерде тәртіп сақшылары тұрған, бірақ олар бұл жайтқа назар аудармаған сыңайлы.

Тұрғындар арасында алаңдаушылық бар. Көпшілік: «Мұндай айла жасаушылар көбейіп барады, жолда өте сақ болыңдар», - деп ескерту жасауда.