Таразда көпқабатты үй отқа оранып, 100 адам эвакуацияланды (ВИДЕО)

Жаңа жыл түні Таразда екі бірдей ірі өрт шығып, көпқабатты үй мен мейрамхана аумағында адамдарды эвакуациялауға тура келді, деп хабарлайды Sn.kz ақпарат порталы.

Оқиғаның біреуі 5-шағынауданда болды. Алғашқы өрт сөндіру бөлімшелері келген сәтте бесінші қабаттағы балкон мен ғимараттың шатыры ашық жалынмен жанып жатқан.

"Тұрғындарды эвакуациялау жүргізілді. Оқиға орнында ТЖД-ның вахталық автокөліктері базасында тұрғындар үшін жылыту пункттері ұйымдастырылды", – делінген хабарламада.

Өрт орнында ТЖД басшысының жетекшілігімен өртті сөндіру бойынша жедел штаб құрылды. Зардап шеккендер туралы ақпарат түскен жоқ. Пікірлерде пайдаланушылар өрттің жергілікті тұрғындар атқан салют салдарынан шығуы мүмкін екенін болжап отыр. Нақты себебі сараптама қорытындысынан кейін белгілі болады.

Қалалық ТЖД мәліметінше, Жамбыл даңғылында Watson Pub мейрамханасының екі қабатты ғимаратына жапсарлас салынған жазғы алаңда да өрт шыққан.

Оқиға орнына келген өрт сөндірушілер мен құтқарушылар мейрамханадан шамамен 100 адамды эвакуациялады. Жедел шаралардың арқасында өрттің мейрамхананың негізгі ғимаратына және жақын маңдағы жанармай құю бекетіне таралуына жол берілген жоқ. Өрт 300 шаршы метр аумақта толық сөндірілді. Зардап шеккендер жоқ. Өрттің шығу себебі анықталып жатыр.