Қазақстандағы референдум учаскелері дауыстарды санауға кірісті

Қазақстанда 15 наурыз күні кешкі сағат 20:00-де барлық референдум учаскелері жабылды. Енді учаскелік комиссиялар бюллетеньдерді санауға кіріседі, ал референдумның ресми нәтижелері 2026 жылғы 21 наурызға дейін жарияланады, деп хабарлайды Sn.kz ақпарат порталы.

2026 жылғы 15 наурызда таңғы сағат 07:00-де елдің барлық өңірінде дауыс беруге арналған 10 388 учаске ашылды. Олар 13 сағат бойы жұмыс істеп, кешкі сағат 20:00-де жабылды.

Енді учаскелік комиссиялар дауыстарды санауға кіріседі. Одан кейін бюллетеньдер жоғары тұрған аумақтық сайлау комиссияларына беріледі. Сол жерден олар Орталық референдум комиссиясына (ОРК) жолданады. Референдум нәтижелері 2026 жылғы 21 наурызға дейін жарияланады.

Сағат 10:00-дегі мәлімет бойынша 2 393 844 қазақстандық бюллетень алды, бұл дауыс беру құқығы бар азаматтардың 19,21 пайызын құрады.

Сағат 12:00-де бұл көрсеткіш 4 677 595 сайлаушыға жетіп, тізімге енгізілген азаматтардың 37,54 пайызын құрады.

Ал сағат 14:00-дегі алдын ала мәліметке сәйкес, жаңа Конституция бойынша референдум өтті деп танылды. Осы уақытқа дейін дауыс беруге 6 471 378 қазақстандық қатысып, бұл тізімдегі азаматтардың 51,93 пайызын құрады.

Толық нұсқасына гиперсілтеме беруді ұмытпаңыз: https://turkystan.kz/article/278078-qazaqstanda-referendumga-arnalgan-sailau-ucaskeleri-zabyldy