Ел аумағында жел күшейіп, кей өңірлерде қар аралас жаңбыр жауады

Қазақстанның 16 өңірінде 15 мамырға арналған дауылды ескерту жарияланды. Ел аумағында қатты жел, шаңды дауыл, найзағай, үсік пен аптап ыстық күтіледі, деп хабарлайды Sn.kz ақпарат порталы.

Жетісу облысында солтүстік-шығыстан соққан желдің екпіні таулы аудандарда секундына 23-28 метрге дейін жетеді. Түнде таулы аймақтарда 1 градус үсік болуы мүмкін. Облыстың оңтүстік-шығысында төтенше өрт қаупі сақталады. Талдықорғанда да жел күшейеді.

Атырау облысының батысы, оңтүстігі мен шығысында жаңбыр жауып, найзағай ойнайды. Кей жерлерде шаңды дауыл болады. Күндіз ауа температурасы 35 градусқа дейін ысиды. Өңірдің солтүстік-батысында төтенше өрт қаупі сақталып отыр.

Алматы облысында солтүстік-шығыс желі күшейіп, екпіні 25 м/с-қа дейін жетеді. Қонаев қаласында да қатты жел күтіледі.

Ақтөбе облысында оңтүстік-шығыс желі күшейеді. Өңірдің оңтүстігінде жоғары өрт қаупі сақталған.

Павлодар облысында түнде және таңертең тұман түсіп, кей жерлерде 4 градусқа дейін үсік жүреді. Өңірде жоғары өрт қаупі сақталады.

Шығыс Қазақстан облысында жаңбыр мен қар аралас жауын-шашын күтіледі. Кей жерлерде найзағай ойнап, жел күшейеді. Түнде 3 градусқа дейін үсік жүруі мүмкін.

Абай облысында да жаңбыр, қар, тұман және қатты жел болжанып отыр. Өңірдің шығысында жоғары өрт қаупі сақталған.

Батыс Қазақстан облысында жаңбыр мен найзағай болады. Орал қаласында желдің екпіні 20 м/с-қа дейін жетеді.

Түркістан облысында және Шымкентте шаңды дауыл күтіледі. Кей аудандарда желдің жылдамдығы 28 м/с-қа дейін күшейеді. Өңірде жоғары өрт қаупі сақталады.

Маңғыстау облысында жаңбыр, найзағай, тұман және шаңды дауыл болады. Солтүстік-шығыс бөлігінде жоғары өрт қаупі сақталған.

Ақмола, Солтүстік Қазақстан, Қарағанды және Ұлытау облыстарында түнгі үсік болжанып отыр. Сонымен қатар бірқатар өңірде жоғары және төтенше өрт қаупі сақталуда.