22 жыл жөндеу көрмеген мектеп: Райымбек ауданында халық пен билік текетіресі

Алматы облысы Райымбек ауданы, Қызылшекара ауылының тұрғындары жергілікті мектептің мүшкіл жағдайына байланысты өз наразылықтарын білдірді, деп хабарлайды Sn.kz ақпарат порталы.

Әлеуметтік желілерде «Той жасауға ақша бар, мектепті жөндеуге жоқ» деген тақырыппен ақпарат тарап, қоғамда үлкен талқылау тудырды. Мәселенің мән-жайы Қызылшекара ауылындағы К. Байшығанов атындағы орта мектептің ғимараты 1979 жылы салынған. Мәліметтерге сәйкес, нысанның шатыры соңғы рет бұдан 22 жыл бұрын, яғни 2004 жылы ғана жаңартылған. Тұрғындардың сөзіне қарағанда, қазіргі уақытта 227 оқушы мен шағын орталықтағы 40 бүлдіршін білім алып жатқан мектептің жағдайы апатты деңгейге жақындаған. Халықты әсіресе ашындырған жайт — мектепті жөндеуге қаржы табылмай отырған тұста, ағымдағы жылдың 5–11 шілде аралығында жайлауда ауданның 90 жылдық мерейтойын ауқымды деңгейде атап өту жоспарланып отырғаны. Жергілікті биліктің ресми позициясы Туындаған жағдайға байланысты Райымбек ауданының әкімдігі ресми мәлімдеме жасады. Басқарма өкілдерінің хабарлауынша, мектепке күрделі жөндеу жұмыстарын жүргізу үшін қажетті жобалық-сметалық құжаттама толықтай дайындалып, мемлекеттік сараптамадан өткізілген. Дегенмен, әкімдік бұл мәселені шешу өз құзыреттеріне кірмейтінін алға тартты.