Құтқарушылар Үлкен Алматы, Кіші Алматы және Қарғалы өзендеріндегі ахуалды үздіксіз бақылап, мониторинг бекеттерінен сағат сайын ақпарат алып отыр.
Алматыда жауын-шашынды ауа райына байланысты тау өзендеріндегі жағдай тәулік бойы бақылауға алынды. Осыған байланысты қалалық Төтенше жағдайлар департаментінің бөлімшелері күшейтілген жұмыс режиміне көшірілді, деп хабарлайды Sn.kz ақпарат порталы.
Құтқарушылар Үлкен Алматы, Кіші Алматы және Қарғалы өзендеріндегі ахуалды үздіксіз бақылап, мониторинг бекеттерінен сағат сайын ақпарат алып отыр. Сондай-ақ, судың кедергісіз ағуын қамтамасыз ету мақсатында Ақсай өзенінің арнасы тазартылды.
Жауын-шашын басталғанға дейін су басу қаупі жоғары учаскелерге қала әкімдігінің мердігер ұйымдарының, Құтқару қызметі мен Төтенше жағдайлар департаментінің күштері мен арнайы техникасы алдын ала орналастырылды. Бұл жағдай күрделенген жағдайда жедел әрекет етуге мүмкіндік береді.
Қазіргі уақытта қала аумағында төтенше жағдайлар тіркелген жоқ. Мамандар тұрғындардың қауіпсіздігін қамтамасыз ету үшін тәулік бойы кезекшілік атқарып, өзендердегі жағдайды тұрақты бақылауда ұстап отыр.