Астаналық тұрғын BI Group салған үйдегі пәтерінде электр желісіне қатысты мәселе туындап, үш күннен бері жарықсыз отырғанын айтып шағымданды, деп хабарлайды Sn.kz ақпарат порталы.
Оның сөзінше, мұндай жағдай бұған дейін де бес рет қайталанып, басқа бөлмелерде де жарық өшкен. Жарияланған видеода тұрғын тоңазытқышты ұзартқыш сым арқылы басқа қуат көзіне қосуға мәжбүр болғанын көрсетеді. Тұрғын мәселені BI Group-қа жеткізген, ал компания өкілі әлеуметтік желіде өтінішті көргенін және мән-жайды анықтап, қайта байланысқа шығатынын жазды. Алайда бір пәтерде электрге қатысты ақаудың бірнеше рет қайталануы үйдегі электр желісінің сапасы мен құрылыс компаниясының жауапкершілігіне қатысты сұрақ туғызады. Енді BI Group тұрғынның шағымына нақты жауап беріп қана қоймай, ақаудың неден шыққанын анықтап, мәселенің қайта қайталанбауына кепілдік беруі керек.