Астанада балалар онкологиясын қолдауға арналған Run for OncoKids қайырымдылық жүгіруі өтті

5 қыркүйекте Астанада балалар онкологиясы мәселесіне қоғам назарын аударып, емделіп жатқан және дертті жеңген балаларға қолдау көрсетуге арналған Run for OncoKids қайырымдылық жүгіруі өтті, деп хабарлайды Sn.kz ақпарат порталы. 

Триатлон паркінде өткен шараға қала тұрғындары, медицина қызметкерлері, еріктілер, балалар мен олардың ата-аналары қатысты.

Бұл күнгі жарыстың мәні спорттық нәтижемен ғана өлшенген жоқ. Қатысушылардың әр қадамы онкологиялық аурумен күресіп жүрген балаларға көрсетілген қолдаудың белгісіне айналды.

Ұйымдастырушылардың мәліметінше, қатысушыларға 1, 2,5 және 5 шақырымдық қашықтықтар ұсынылды.

«Олар – өмірлік чемпиондар»

Жарысқа онкологиялық аурудан емделіп шыққан балалар да қатысты. Медицина қызметкерлері оларды бекерге «чемпиондар» деп атамайды. Өйткені олардың жеңісі медальмен немесе секундпен өлшенбейді.

Онкология бөлімінің мейірбикесі Ақбілек үшін бұл күннің орны бөлек.

«Бұл іс-шара біз үшін өте маңызды. Себебі бізден емделіп шыққан чемпион балаларды басқа қырынан танып, олардың өмірлік чемпион екенін көру – біз үшін үлкен бақыт», – дейді ол.

Медицина мамандары үшін баланың ауруханадан шығып, қатарластарының ортасында еркін жүруі – ұзақ емнің ең қуанышты нәтижелерінің бірі. Сондықтан бұрын аурухана дәліздерінде кездескен балаларды жүгіру алаңынан көру медицина қызметкерлері үшін де ерекше сәт болды.

Бір баланың тағдырына бейжай қарамаған жандар

Run for OncoKids жарысына қатысушылардың әрқайсысының өз себебі бар. Солардың бірі – Елубайқызы Хатиджа. Оның бұл шараға келуіне жақын адамының онкология бөлімінде жұмыс істеуі себеп болған.

«Бұл марафонға қатысуымның бір себебі – жеңгем осы онкология бөлімінде жұмыс істейді. Ол балалардың күнделікті жағдайын, қандай қиындықтарға тап болатынын айтып отырады. Оларға қолдау көрсету үшін осы марафонға қатысуды шештім», – дейді қатысушы.

Хатиджа үшін бұл – жай ғана жүгіру емес, балаларға қолдау білдірудің бір жолы.

«Балаларға айтарым: мен сендерге сенемін. Сендердің қолдарыңнан келеді. Үміттеріңді үзбеңдер. Біз сендерді әрдайым қолдаймыз», – дейді ол.

Жақсылықтың өлшемі – адамның жанында болу

Run for OncoKids шарасының негізгі мақсаты – балалардың күресін қоғам назарынан тыс қалдырмау және емделіп жатқан балаларға қолдау көрсету.

Балалар онкологиясы туралы сөз болғанда, мәселе тек медициналық еммен шектелмейді. Ұзақ уақыт ауруханада жатқан баланың қатарластарының ортасына қайта оралуы, күнделікті өмірге бейімделуі де маңызды. Мұндай кезде қоғамның қолдауының мәні арта түседі.

Сондықтан қайырымдылық жүгіруіне қатысқан әр адам бұл күні кішкентай пациенттерге жалғыз емес екенін сезіндіруге үлес қосты.

OncoKids атауы балалардың диагнозын емес, олардың өмірге деген жігерін алдыңғы орынға шығаруды көздейді. Ал бүгінгі шараға жиналғандар үшін ең маңызды нәтиже – мәреге бірінші болып жету емес, балаларға үміт сыйлау болды.

Өйткені кейде қолдау көрсету үшін көп нәрсе қажет емес. Бірге жүгіру, жанында болу, сенім білдірудің өзі үлкен демеу.